पर्सामा १६० किलो गाँजा सहित कार चालक पक्राउ, २२,५०० रुपैयाँ नगद र स्मार्टफोन समेत बरामद

वीरगन्ज । पर्साको पकहाँमैनपुर गाउँपालिकाबाट सशस्त्र प्रहरी बल नेपाल र नेपाल प्रहरीको संयुक्त टोलीले ठूलो परिमाणको गाँजा बरामद गरेको छ। सोमबार दिउँसो भएको कारबाहीमा, टोलीले १६० किलो गाँजा र चालकसहित ५४३२ नम्बरको सुजुकी स्विफ्ट कारलाई नियन्त्रणमा लिएको हो।

संयुक्त टोलीले पकहाँमैनपुर गाउँपालिकाको मधुवनीचोकतर्फ आउँदै गरेको उक्त कारलाई जाँच गर्ने क्रममा चालक बुद्धिलाल घलानलाई पक्राउ गरेको हो। प्रहरीका अनुसार, पक्राउ परेका घलानले कारको डिक्कीबाट प्याकिङ गरिएको गाँजा फ्याँक्ने प्रयास गर्दै थिए।

गांजा सहित पक्राउ परेका घलानको साथबाट २२,५०० रुपैयाँ नगद र रियलमी कम्पनीको स्मार्टफोन समेत बरामद भएको छ। प्रहरीका अनुसार, पक्राउ परेका घलानलाई आवश्यक अनुसन्धानका लागि इलाका प्रहरी कार्यालय पोखरियामा पठाइएको छ।

सशस्त्र प्रहरी बल नेपाल नम्बर १३ गण हेडक्वाटरका गणपति क्षेत्रीले, यस घटना सम्बन्धी थप अनुसन्धान भइरहेको जानकारी दिए। यस किसिमको ठूलो परिमाणको गाँजा नियन्त्रणमा लिनु निसन्देह नेपालका लागि एक महत्वपूर्ण सफलता हो।