सुदर्शन बरालको आरोप: हदबन्दीभन्दा बढी जग्गा भेटिँदा पनि गृहमन्त्रीमाथि कारबाही भएन

बुटवल । नेपाली कम्युनिस्ट पार्टी (नेकपा)का लुम्बिनी प्रदेश संयोजक तथा पूर्वमन्त्री सुदर्शन बरालले गृहमन्त्री सुधन गुरुङमाथि हदबन्दीभन्दा बढी जग्गा भएको दाबी गर्दै पनि सरकारले कारबाही नगरेको आरोप लगाएका छन्।

रुपन्देहीमा आयोजित पार्टीको कार्यक्रममा बोल्दै बरालले सर्वसाधारणसँग केही हजार रुपैयाँ भेटिँदा कारबाही गर्ने सरकारले गृहमन्त्रीको नाममा कानुनविपरीत जग्गा भेटिएको भनिँदा पनि छानबिन नगरेको बताएका हुन्।

‘कानुनविपरीत हदबन्दीभन्दा बढी जग्गा भेटिँदा पनि गृहमन्त्रीमाथि कारबाही हुँदैन,’ उनले भने। राष्ट्रिय स्वतन्त्र पार्टीका मन्त्री तथा सांसदसँग सयौँ तोला सुन रहेको र बालेनलाई करोडौँको गाडी उपलब्ध गराएको भनी विवादमा आएका व्यापारी कमल मालपानीमाथि पनि छानबिन नभएको उनको आरोप छ।

बरालले सरकारले देशलाई ‘पुलिस स्टेट’ बनाउन खोजेको आरोपसमेत लगाए। नागरिकता विवादमा परेकी आनी छोइङ डोल्मामाथि छानबिन र कारबाही गर्नुको सट्टा लुम्बिनी विकास कोषमा नियुक्ति दिइएको भन्दै उनले आपत्ति जनाए।