हेटौंडामा प्रदेशका शिक्षामन्त्री र विश्वविद्यालयहरूको सम्मेलन सुरु

हेटौंडा (मकवानपुर) । शिक्षा क्षेत्रको विकास, उच्च शिक्षाको गुणस्तर सुधार र अन्तरप्रदेशीय सहकार्य सुदृढ गर्ने उद्देश्यले बागमती प्रदेशको राजधानी हेटौंडामा प्रदेशका शिक्षामन्त्री तथा प्रदेश विश्वविद्यालयहरूको सम्मेलन सुरु भएको छ ।

दुई दिनसम्म सञ्चालन हुने सम्मेलनको संघीय सरकारका शिक्षा तथा खेलकुदमन्त्री सस्मित पोखरेलले उद्घाटन गरे । कार्यक्रममा विभिन्न प्रदेशका मन्त्री, विश्वविद्यालयका उपकुलपति तथा कुलपति, रजिस्ट्रार, प्रदेश सरकारका सचिव, राष्ट्रिय योजना आयोगका सदस्य, विश्वविद्यालय अनुदान आयोगका अध्यक्ष र शिक्षा क्षेत्रका विज्ञ सहभागी छन् ।

बागमती विश्वविद्यालयका अध्यक्ष प्रा. डा. चन्द्रमणि पौडेलको अध्यक्षतामा भएको उद्घाटन सत्रमा बागमती प्रदेशका मुख्यमन्त्री किरण थापामगर विशिष्ट अतिथिका रूपमा उपस्थित थिए ।

सम्मेलनको पहिलो दिन कोशी, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशका प्रतिनिधिले आ–आफ्नो प्रदेशका शैक्षिक अभ्यास, उपलब्धि र चुनौतीबारे अनुभव आदानप्रदान गर्ने कार्यक्रम छ । त्यसक्रममा प्रदेशहरूबीच सहकार्य गर्न सकिने क्षेत्रबारे पनि छलफल हुनेछ ।

संघीयता कार्यान्वयनका क्रममा शिक्षा क्षेत्रमा देखिएका अवसर र चुनौती, संघ तथा प्रदेशबीचको समन्वय, प्रदेश विश्वविद्यालयहरूको संस्थागत विकास र उच्च शिक्षाको गुणस्तर अभिवृद्धि सम्मेलनका मुख्य विषय छन् । त्यस्तै, शैक्षिक ज्ञान, अनुभव र स्रोतको आदानप्रदान गर्दै उच्च शिक्षा विकासका लागि साझा रणनीति तयार गर्ने विषयलाई पनि प्राथमिकता दिइनेछ ।

सम्मेलनले प्रदेशस्तरको शिक्षा प्रणालीलाई प्रभावकारी बनाउन, उच्च शिक्षामा सहकार्यका सम्भावना पहिचान गर्न तथा आगामी दिनमा अपनाउन सकिने नीतिगत र व्यावहारिक उपायबारे साझा धारणा बनाउन सहयोग पुग्ने अपेक्षा गरिएको छ ।