प्रचण्डले भदौ २४ को विध्वंसात्मक घटनाको गम्भीर र बहुआयामिक अनुसन्धानको माग गरे

काठमाडौं – नेपाली कम्युनिस्ट पार्टीका संयोजक र अध्यक्ष पुष्पकमल दाहाल ‘प्रचण्ड’ले भदौ २४ गते भएको विध्वंसात्मक घटनालाई नेपालको इतिहासकै सबैभन्दा रहस्यमय र भयानक घटना भएको बताएका छन्। उनले यस घटनाको गम्भीर र बहुआयामिक अनुसन्धान आवश्यक रहेको उल्लेख गरेका छन्।

प्रचण्डले भिडियो सन्देश जारी गर्दै भने, “आजको दिनलाई सम्झिदा मैले नेपालको राष्ट्रिय स्वाधीनता र जनतामाथि भएको यो स्तरको हमला, हाम्रो लोकतान्त्रिक आन्दोलन र आकांक्षामाथि भएको प्रहार र केही घण्टा भित्रै भएको यो विध्वंस साच्चै नै रहस्यमय छ। यसले के माग गर्छ भने यसको गहिरो अध्ययन र अनुसन्धान गर्नुपर्छ। यस घटनालाई मच्चाउने तत्व को हुन्, वास्तविक दोषी को हुन्, यसका सत्य तथ्य के हुन् भन्ने कुरा अनुसन्धान गर्नुपर्छ र दोषीलाई कारबाही गर्नुपर्छ।”

उनले घटनाको सत्यता बाहिर ल्याउने काम अझै पूर्ण रुपमा हुन नसकेको जिकिर गरे। राष्ट्रिय मानव अधिकार आयोगले तयार पारेको प्रतिवेदनप्रति पनि आपत्ति जनाएका छन्। “गएको एक वर्षमा यस घटनाको सत्यतथ्य बाहिर ल्याउने कामले गति नलिएको छ। आयोगले तयार पारेको प्रतिवेदन पनि कार्यान्वयनको दिशामा अघि बढेको छैन। बरु यसलाई दराजमा राखिएको देखिन्छ,” उनले बताए।

प्रचण्डले भदौ २३ गते युवाहरूले उठाएका सुशासन र पारदर्शिताका मागलाई भदौ २४ को घटनाले सम्बोधन गरेको छैन भन्ने दाबी गरे। उनले भने, “भदौ २४ को घटनाले युवाहरूको भावना र आकांक्षालाई होइन, बरु उनीहरूको प्रहार भएको देखिन्छ। यसले युवाको आन्दोलनलाई अपहरण गर्ने र त्यसलाई कब्जा गर्ने प्रयासहरूलाई संकेत गर्दछ।”

उनले घटनाको राष्ट्रिय र अन्तर्राष्ट्रिय आयामलाई पनि उनले जोड दिए। वर्तमान भूराजनीतिक अवस्थालाई ध्यानमा राख्दै उनले यसको अन्तर्राष्ट्रिय स्तरबाट अध्ययन र अनुसन्धान आवश्यक रहेको बताए। “यस घटनाको राष्ट्रिय र अन्तर्राष्ट्रिय दुवै आयाम छन्। यसको अन्तर्राष्ट्रिय स्तरबाट पनि अध्ययन गर्न आवश्यक छ। यसका कारण भूराजनीतिक परिस्थितिहरूलाई पनि ध्यान दिनुपर्छ,” उनले बताए।

प्रचण्डको विचारमा, यस घटनाको पूर्ण सत्य बाहिर ल्याउने र यसको अनुसन्धान गर्नुपर्ने आवश्यकता अत्यन्तै महत्वपूर्ण छ, ताकि दोषीहरूलाई न्याय मिलोस् र यस्तो घटना पुनः नदोहोरियोस्।