नवराजपुरका शिवदेव साहले निराहार उपवाससहित सम्पन्न गरे नवरात्र, नौ कुमारी कन्याको पूजा

महेश सिंह, लहान सिरहा– विश्व हिन्दु परिषद् नेपालका सिरहा जिल्ला अध्यक्ष शिवदेव साहले विजयादशमीको घटस्थापनादेखि निराहार उपवास बसेर नवरात्र सम्पन्न गर्नुभएको छ।

सिरहाको नवराजपुर गाउँपालिका–नहरनियाँ निवासी साह धार्मिक आस्थासँगै सामाजिक चिन्तनमा सक्रिय रहँदै आउनुभएको छ। उहाँले समाजमा धार्मिक संस्कार, परम्परा र सामाजिक मूल्यमान्यताको संरक्षण तथा सामाजिक रूपान्तरणमा योगदान पुर्‍याउने उद्देश्यले विभिन्न धार्मिक गतिविधिमा सहभागिता जनाउँदै आउनुभएको छ।

नवरात्रको अवसरमा अध्यक्ष साहले नवौँ दिन कुमारी कन्या भोजन कार्यक्रमसमेत आयोजना गर्नुभएको छ। विश्व हिन्दु परिषद् नेपाल सिरहाको अध्यक्षको जिम्मेवारीमा रहेर परिषद्सँग आबद्ध विभिन्न समिति तथा सदस्यहरूलाई आमन्त्रण गरी उहाँले धार्मिक परम्पराअनुसार कुमारी कन्याहरूलाई भोजन गराउनुभएको हो।

कार्यक्रममा परिषद्का सिरहा जिल्ला कोषाध्यक्ष ज्ञानेन्द्रविक्रम यादव, पवन यादव, शिवराम यादव, शिक्षक लक्ष्मण यादवलगायतको सहभागिता रहेको थियो। अध्यक्ष साह र उहाँकी धर्मपत्नीले हिन्दु परम्पराअनुसार नौ जना कुमारी कन्यालाई वस्त्र, भोजन तथा दक्षिणा प्रदान गर्नुभएको थियो।

बुधबार पूजा–अर्चना गरी नवरात्र सम्पन्न गरिएको अध्यक्ष साहले जानकारी दिनुभयो। धार्मिक आस्था, परम्परा र संस्कारको संरक्षण गर्ने उद्देश्यले कुमारी कन्या भोजन कार्यक्रम आयोजना गरिएको उहाँले बताउनुभयो।