संसद्मा थप १४ विधेयक दर्ता गर्ने तयारी, ३६ वटा विधेयक विचाराधीन
- काठमाडौं ।
- सरकारले थप १४ वटा विधेयक संघीय संसद्मा दर्ता गर्ने तयारी अन्तिम चरणमा पुर्याएको छ।
काठमाडौं । सरकारले थप १४ वटा विधेयक संघीय संसद्मा दर्ता गर्ने तयारी अन्तिम चरणमा पुर्याएको छ। कानुन, न्याय तथा संसदीय मामिला मन्त्रालयका अनुसार विधेयकहरू संसद्मा पेस गर्ने प्रक्रिया अघि बढिरहेको छ।
हाल संघीय संसद्मा ३६ वटा विधेयक विचाराधीन छन्। तीमध्ये २४ वटा संसदीय समितिमा दफावार छलफलका क्रममा छन्। एउटा विधेयक राष्ट्रिय सभामा रहेको छ भने बाँकी विधेयक सम्बन्धित सभामै छन्।
संसद् सचिवालयका सहसचिव एवं प्रवक्ता एकराम गिरीका अनुसार पछिल्ला दुई अधिवेशनमा दुवै सभाबाट १२ वटा विधेयक पारित भएका छन्। तीमध्ये ११ वटा विधेयक राष्ट्रपतिबाट प्रमाणीकरण भइसकेका छन् भने एउटा प्रमाणीकरणको प्रक्रियामा छ।
संसद्मा दर्ताको तयारीमा रहेका विधेयकमा अख्तियार दुरुपयोग अनुसन्धान आयोग ऐन संशोधन विधेयक र राष्ट्रिय सतर्कता केन्द्रसँग सम्बन्धित ऐन संशोधन विधेयक छन्। कम्पनी ऐन संशोधन विधेयक, पाँचवटा संहिता संशोधन विधेयक र औद्योगिक सम्पत्तिसम्बन्धी विधेयक पनि दर्ता गर्ने तयारी भइरहेको मन्त्रालयले जनाएको छ।
अर्थ मन्त्रालयले सार्वजनिक ऋण व्यवस्थापन र विदेशी विनिमयसम्बन्धी विधेयक अघि बढाएको छ। ऊर्जा मन्त्रालयले नवीकरणीय ऊर्जासम्बन्धी विधेयक तथा जलस्रोतसम्बन्धी ऐन संशोधन विधेयकको प्रक्रिया अगाडि बढाएको छ।
त्यस्तै, पूर्वाधार न्यायाधिकरण र कृषिसम्बन्धी विधेयक पनि तयारीको चरणमा छन्। पशु वधशालासम्बन्धी विधेयकसमेत छिट्टै संसद्मा दर्ता गर्ने गरी काम भइरहेको मन्त्रालयले जनाएको छ। कानुन, न्याय तथा संसदीय मामिला मन्त्रालयले कुन विधेयक कुन चरणमा पुगेको छ भन्नेबारे अनुगमन गरिरहेको छ। थप १४ वटा विधेयक संसद्मा दर्ता गर्ने प्रक्रिया अघि बढिरहेको मन्त्रालयको भनाइ छ।
प्रतिक्रिया
यो पनि पढौँ
यो पनि पढौँ
