भारतबाट अवैध रूपमा चकलेट ल्याउँदै गरेका ६ नेपाली पक्राउ, ९६० किलो चकलेट बरामद

रौतहट । भारत–नेपाल सीमामा तस्करी नियन्त्रणका लागि गरिएको कारबाहीमा सशस्त्र सीमा बल (एसएसबी) ले २४ बोरा चकलेटसहित ६ जना नेपाली नागरिकलाई पक्राउ गरेको छ। बरामद चकलेटको तौल ९६० किलो रहेको एसएसबीले जनाएको छ।

बारा जिल्लासँग सीमा जोडिएको भारतको नायकटोला गाउँनजिक शनिबार साँझ एसएसबीको ७१औँ वाहिनीअन्तर्गत ई–कम्पनी, बीओपी नायकटोलाको टोलीले विशेष सूचनाका आधारमा कारबाही गरेको हो।

एसएसबीका अनुसार, नेपालतर्फबाट साइकलमा सामान बोकेर भारत प्रवेश गरी पुनः नेपाल फर्कँदै गरेका व्यक्तिहरूमाथि निगरानी राखिएको थियो। शंकास्पद गतिविधि देखिएपछि टोलीले नाकाबन्दी गरी उनीहरूलाई नियन्त्रणमा लिएको हो।

तलासीका क्रममा ६ वटा साइकलमा लोड गरिएका २४ बोरा चकलेट फेला परेको एसएसबीले जनाएको छ। पक्राउ पर्नेमा बाराको सीमावर्ती कलैया उपमहानगरपालिका–मटिअर्वाका ४० वर्षीय राजु महतो, ४८ वर्षीय रामानन्द महतो, ४५ वर्षीय सुरेन्द्र महतो, ४७ वर्षीय रामप्रवेश मण्डल, ४५ वर्षीय महेन्द्र महतो र २२ वर्षीय विकासकुमार मण्डल छन्।

एसएसबीका अनुसार उनीहरू भारतबाट अवैध रूपमा नेपालतर्फ चकलेट लैजाँदै गरेको अवस्थामा पक्राउ परेका हुन्। पक्राउ परेका व्यक्ति, बरामद चकलेट र साइकललाई थप कानुनी कारबाहीका लागि मोतिहारीस्थित भन्सार कार्यालयमा बुझाइएको छ। सीमा क्षेत्रमा तस्करी नियन्त्रण गर्न निगरानी र गस्ती थप कडा पारिएको एसएसबीले जनाएको छ।