महोत्तरीमा व्यवसाय अनुगमन: त्रुटी सुधार र कानुनी कारवाहीको चेतावनी

महोत्तरी — महोत्तरी जिल्लाको बर्दिवास बजारमा प्रशासनले गरेको व्यवसाय अनुगमनपछि व्यवसायीहरूलाई त्रुटी सुधार गर्न र नियम अनुसार व्यवसाय संचालन गर्न सुझाव दिइएको छ। बर्दिवासमा सञ्चालन भइरहेका मार्ट, किराना पसल, डिपार्टमेन्ट स्टोर, कास्मेटिक पसल, मिठाई पसल र मसाज सेन्टरहरूको अनुगमन गर्दै प्रशासनले व्यवसायीहरूलाई सचेत गराएको हो।

ईलाका प्रशासन कार्यालय बर्दिवासका प्रमुख माधवराज न्यौपानेको नेतृत्वमा, बर्दिवास उद्योग वाणिज्य संघ, उपभोक्ता संरक्षण मंच, प्रहरी र सरोकारवालाहरूले आइतबार करिब तीन घण्टा बजार अनुगमन गरेका थिए। अनुगमनका क्रममा व्यवसायको कागजपत्रहरू समयमै नदेखिनु, म्याद गुज्रिएका सामानहरू भेटिनु, उत्पादन मिति नभएको सामान राखिनु, मूल्य सूची नदेखिनु र बिल काटेर व्यापार नगर्नु जस्ता त्रुटिहरू देखिएको उनले बताए।

विशेष गरी, पछिल्लो समयमा मसाज सेन्टरहरूमा अनैतिक क्रियाकलापहरूको विषयमा आवाज उठेकाले, त्यहाँ समेत अनुगमन गरिएको थियो। रोयल र रेडरोड मसाज सेन्टरहरूमा बिल काटिएर व्यवसाय नभएको र व्यक्तिको व्यक्तिगत विवरण नराखिएको पाइएपछि, सबै मसाज सेन्टरहरूका लागि व्यक्तिगत परिचयपत्र र विवरण राख्न र बिल काटेर व्यवसाय गर्न सचेत गराइएको छ।

प्रशासनले घर संसार, बर्दिवास घर संसार, मेट्रो मार्ट, महतो किराना पसल, एम आर बेकरी, प्रनु कास्मेटिक एण्ड गिफ्ट हाउस, श्री राम स्वीट एण्ड चाट हाउस र मसाज सेन्टरहरूमा पहिलो पटक अनुगमन गरेको हो। यस क्रममा कुनै कारवाही नगरिएको भएता पनि, अनुगमन समितिले व्यवसायीहरूलाई त्रुटी सुधार र सचेत रहने चेतावनी दिएको छ।

यदि दोहोर्याएर अर्को अनुगमनमा त्रुटि भेटिएमा, कानुनी कारवाही र जरीवाना लाग्ने सम्बन्धमा समेत जानकारी गराइएको छ। उपभोक्ता संरक्षण मंचका दीपेन्द्र पराजुलीका अनुसार, यसरी अनुगमनको उद्देश्य व्यवसायीहरूलाई नियम पालनामा सचेत बनाउनु नै हो र भविष्यमा सुधार नभए थप कारवाही हुने चेतावनी दिइएको छ।