जनकपुर बोल्ट्सको एनपीएलमा पहिलो जित, काठमाडौंलाई ८ विकेटले हरायो

काठमाडौं । जनकपुर बोल्ट्सले नेपाल प्रिमियर लिग (एनपीएल) को तेस्रो संस्करणमा पहिलो जित निकालेको छ । त्रिवि क्रिकेट मैदानमा काठमाडौं गोर्खाजले दिएको ११६ रनको लक्ष्य जनकपुरले १७ ओभर २ बलमा २ विकेट गुमाएर पूरा गर्‍यो ।

जनकपुरको जितमा ओपनर मोइन अलीले अविजित अर्धशतक बनाए । उनले ५१ बलमा ३ चौका र ३ छक्कासहित ५८ रन जोडे । सैफ हसन ३९ बलमा ४० रन बनाएर अविजित रहे । मोइन र हसनले तेस्रो विकेटका लागि ७९ रनको अविजित साझेदारी गर्दै टोलीलाई जितसम्म पुर्‍याए ।

जनकपुरले ७ रन हुँदा ओपनर तृतराज दासलाई गुमाएको थियो । उनी ५ रनमा आउट भए । मयन यादव ९ रनमा पभेलियन फर्किँदा जनकपुरको स्कोर ३७ रन थियो । त्यसपछि मोइन र हसनले खेल सम्हाले । काठमाडौंका रिपोन मोन्डलले एक विकेट लिए ।

यसअघि टस जितेर पहिले ब्याटिङ गरेको काठमाडौं १९ ओभर ३ बलमा ११५ रनमा अलआउट भएको थियो । जनकपुरका राहुल यादवले उत्कृष्ट बलिङ गर्दै ४ ओभरमा ३१ रन खर्चिएर ४ विकेट लिए । उनले दुवै ओपनर साम हिजलेट र स्मित पटेलसँगै कप्तान करण केसी तथा मोहम्मद आदिल आलमलाई आउट गरे । सैफ हसनले २ विकेट लिए भने मोइन अली, कप्तान हर्मीत सिंह र ललित राजवंशीले एक–एक विकेट हात पारे ।

काठमाडौंका भीम सार्कीले सर्वाधिक ३३ रन बनाए । उनले २९ बलमा ४ चौका प्रहार गरे । काठमाडौंले खेलभर कुनै ठूलो साझेदारी बनाउन सकेन । ६ रन हुँदा साम हिजलेट एक रनमा र १९ रन पुग्दा हरिशंकर शाह ९ रनमा आउट भए ।

त्यसपछि पनि काठमाडौंले लगातार विकेट गुमायो । रसिद खानले १७, स्मित पटेलले १३, सुमित महर्जनले १०, करण केसीले ८ र जहानदाद खानले ५ रन बनाए । रिपोन मोन्डल ९ रनमा आउट भए भने शाहव आलम ४ रनमा अविजित रहे । आदिल आलम पहिलो बलमै आउट भए ।

पहिलो खेलमा जनकपुर कर्णाली याक्ससँग १९ रनले पराजित भएको थियो । आजको दोस्रो खेलमा साँझ ५ बजे विराटनगर किंग्स र कर्णाली याक्स भिड्नेछन् ।