घर लिप पोतका लागि माटो खन्ने क्रममा ढिस्कोले पुरिएर किशोरीको मृत्यु

डोटी — घर लिप पोतका लागि माटो खन्ने क्रममा ढिस्कोले पुरिएर १६ वर्षीया किशोरी एलिना सिंहको मृत्यु भएको छ। घटनास्थल डोटी जिल्लाको सायल गाउँपालिका–२ ग्वानीमा आज बिहान ९ः४८ बजे भएको हो।

जिल्ला प्रहरी कार्यालय डोटीका अनुसार, उक्त घटना घर नजिकैको गौसिल भन्ने स्थानमा भएको हो। माटो खन्ने क्रममा ढिस्कोले पुरिएर घटनास्थलमै किशोरी एलिना सिंहको मृत्यु भएको र उनको शव उद्दार गर्न प्रहरी टोली घटनास्थलतर्फ पठाइएको प्रहरीले जानकारी दिएको छ। प्रहरी निरीक्षक सुवर्ण चन्दको नेतृत्वमा चार सदस्यीय टोली घटनास्थलतर्फ प्रस्थान गरेको छ।

घटनाको थप अनुसन्धान जारी रहेको र शव पोस्टमार्टमका लागि पठाइने प्रक्रिया भइरहेको जिल्ला प्रहरी कार्यालयले जनाएको छ। यो दुःखद घटना परिवार तथा सम्पूर्ण गाउँमा शोकलहर छाएको छ। रासस