सुनको बिस्कुट देखाई १४ लाख ठगी गर्ने आरोपी पक्राउ, ५४७ ग्राम पहेँलो धातु सहित पक्राउ

काठमाडौं – काठमाडौंको टोखाबाट प्रहरीले सुनको बिस्कुट जस्तो देखाएर १४ लाख रुपैयाँ ठगी गरेको एक व्यक्तिलाई पक्राउ गरेको छ। प्रहरीले सिन्धुली जिल्लाका ३८ वर्षीय विजय लामा मोक्तान (धनवीर वाइबा) लाई नियन्त्रणमा लिएको हो।

जिल्ला प्रहरी परिसर काठमाडौंका अनुसार, वाइबाले सुनको बिस्कुट जस्तो देखिने पहेँलो धातु देखाएर पीडितलाई विश्वास दिलाएका थिए कि त्यो सक्कली सुन हो। उनले बिल नभएको र रकमको निकै खाँचो परेको भन्दै पीडितलाई झुक्याएर नगद १४ लाख रुपैयाँ ठगी गरेका थिए। पीडितको उजुरीपछि प्रहरीले अनुसन्धान सुरु गरेको थियो।

प्रहरी टोलीले चैत ९ गते बेलुका करिब ७ बजे टोखा नगरपालिका–९ शिवमन्दिरस्थित एक होटलको कोठामा उनलाई लुकिरहेको अवस्थामा फेला पारेको हो। खानतलासी गर्दा वाइबाको साथबाट झोलाभित्र लुकाइ राखिएको ५४७.६९० ग्राम तौल भएको पहेँलो धातु बरामद भएको छ।

त्यसैगरी, प्रहरीले उनलाई साथबाट एक थान बिल, चेकबुक, राहदानी, तीन वटा मोबाइल फोन, सुनको मुन्द्रा र नगद १ हजार २० रुपैयाँ समेत बरामद गरेको छ। पक्राउ परेका वाइबाको थप अनुसन्धान गर्न काठमाडौँ जिल्ला अदालतबाट ५ दिनको म्याद थप गरी प्रहरी वृत्त थानकोटले अनुसन्धान जारी राखेको छ।

प्रहरी उपरीक्षक पवन कुमार भट्टराईका अनुसार, यस घटनासँग जोडिएका अन्य व्यक्तिहरूको खोजी तथा अनुसन्धान भइरहेको छ। यस प्रकारको ठगीको घटना सामाजिक सावधानी र सतर्कता अपनाउन आवश्यक रहेको प्रहरीले बताएका छन्।