१४ वर्षदेखि अलपत्र कमला पुल अब तीन महिनामा पूरा गर्ने निर्माण कम्पनीको प्रतिबद्धता

धनुषा/सिरहा — भौतिक पूर्वाधार तथा यातायातमन्त्री कुलमान घिसिङको स्थलगत अनुगमन र कडा निर्देशनपछि धनुषा र सिरहालाई जोड्ने कमला नदीको कमलबढिया पुल तीन महिनाभित्रै सक्ने प्रतिज्ञा निर्माण कम्पनीले गरेको छ। तराई–मधेसको “लाइफ लाइन” मानिने हुलाकी राजमार्गअन्तर्गत पर्ने यो पुल विसं २०६८ मा तीन वर्षमै सम्पन्न गर्ने सम्झौतासहित सुरु गरिएको भए पनि १४ वर्ष बित्दा पनि अपूरै रहँदै आएको थियो।

स्थलगत निरीक्षण : डुङ्गा चढेर मन्त्री घिसिङको प्रत्यक्ष अनुभव

शुक्रबार मन्त्री घिसिङले पुल निर्माणस्थल पुगेर स्थानीयले वर्षौंदेखि भोग्दै आएको जोखिम, सास्ती र असुरक्षा नजिकबाट अवलोकन गरे। उनले स्वयं डुङ्गा चढेर नदी पार गर्दै स्थानीय बासिन्दाको दैनिक कठिनाइ प्रत्यक्ष अवलोकन गरे, जसले उनमा गहिरो भावनात्मक प्रभाव पारेको बताइएको छ।

निरीक्षणपछि मन्त्री घिसिङले सामाजिक सञ्जालमा आफ्नो ‘मन भारी भएको’ उल्लेख गर्दै लेखे—
“विसं २०६८ को जेठमा तीन वर्षमै सक्ने गरी सम्झौता गरिएको यो पुल आजसम्म अधुरो छ र यसको सबैभन्दा ठूलो मार स्थानीय बासिन्दाले बेर्नुपरेको छ। अनुगमनका क्रममा स्थानीयले भोग्दै आएको सास्ती, जोखिम र आक्रोश प्रत्यक्ष देख्दा मन निकै भारी भयो। स्थानीयका वर्षौंदेखिका कष्ट कति कठोर र चुनौतीपूर्ण छन् भन्ने कुरा झनै स्पष्ट भयो।”

अस्थायी व्यवस्थाबारे छलफल

मन्त्री घिसिङले स्थानीयको तत्कालीन आवतजावत सहज बनाउन अस्थायी विकल्पबारे विस्तृत छलफल भएको बताएका छन्। सम्बन्धित प्राविधिक पक्षका समस्या समाधानमा जिम्मेवार निकायहरू सक्रिय हुने र मन्त्रीस्तरीय अनुगमन निरन्तर जारी रहने पनि उनले स्पष्ट पारे।

निर्माण कम्पनीको तीन महिनाभित्र पुल सम्पन्न गर्ने घोषणा

पुल निर्माणको जिम्मेवारी लिएको लुम्बिनी बिल्डर्सका सञ्चालक विष्णुप्रसाद शर्माले मन्त्रीसमक्ष तीन महिनाभित्र पुल पूर्णरूपमा सञ्चालनमा ल्याउने प्रतिवद्धता व्यक्त गरे।
उनका अनुसार, “हामी मन्त्रीज्यूसँग प्रतिवद्ध गर्दछौँ कि तीन महिनाभित्र पुल निर्माण सम्पन्न गरेर जनताका लागि सञ्चालनमा ल्याइनेछ।”

१३ वर्षमा नौ पटक म्याद थपिँदासमेत पुल अधुरै

• विसं २०६८ मा पप्पु कन्स्ट्रक्सनसँग तीन वर्षमै पुल निर्माण सक्ने सहमति भएको थियो।
• तर, काममा निरन्तर ढिलाइ भएपछि पप्पु कन्स्ट्रक्सन कालो सूचीमा पर्‍यो।
• त्यसपछि बाँकी काम लुम्बिनी बिल्डर्स ले गर्दै आएको छ।
• १३ वर्षमा पटक–पटक नौौँपटक म्याद थप्ने प्रक्रिया चलिरहेको छ।

विसं २०७८ असार १७ को बाढीले पुलका दुई जग भासिँदा उल्लेख्य क्षति पुगेको थियो।
कुल ४६९ मिटर लम्बाइको पुलको अहिले ८३ प्रतिशत भौतिक र ८२ प्रतिशत वित्तीय प्रगति भएको मन्त्रालयले जनाएको छ।

अनुगमन टोलीमा उच्चस्तरीय उपस्थिति

मन्त्री घिसिङसँगै युवा तथा खेलकुदमन्त्री बब्लु गुप्ता, मन्त्रालयका सचिव केशवकुमार शर्मा, सडक विभागका महानिर्देशक विजय जैशी, हुलाकी राजमार्ग निर्देशनालयका प्रतिनिधि, योजना कार्यालय जनकपुरका प्रमुख कृष्णकुमार महतो तथा जेन्जी अगुवाहरू सुदन गुरुङ, शिव यादव, पुरषोत्तम यादवलगायतको टोली स्थलगत अनुगमनमा सहभागी थियो।

मधेस प्रदेशको विकासका लागि महत्वपूर्ण परियोजना

कमला नदीको यो पुल मधेस प्रदेशमा यातायात सुगमता, जोखिम न्यूनीकरण, व्यापारिक आवागमन र आर्थिक उन्नतिका लागि महत्वपूर्ण मानिन्छ। मन्त्रालयले अब नियमित अनुगमन, सहजीकरण र आवश्यक सहयोगमार्फत कामलाई तोकिएको समयमै सम्पन्न गराउने प्रतिबद्धता दोहोर्याएको छ।