पोखरा-दुबई नियमित उडान सफल र दिगो बनाउन नेपाल-यूएई बीच छलफल

पोखरा – पोखरा र दुबईबीच नियमित उडान सुरु गर्न सफल र दिगो बनाउने उद्देश्यले नेपालका प्रमुख पर्यटन व्यवसायीहरू र संयुक्त अरब इमिरेट्स (यूएई) का राजदूत अब्दुल्लाह बिन साइद मुबारक जरवान अल साम्सीबीच महत्वपूर्ण छलफल भएको छ। यस कार्यक्रममा पोखराका व्यवसायी र पर्यटन क्षेत्रका नेताहरूले यस उडानको दीर्घकालीन सफलता र नेपाल, गण्डकी प्रदेश तथा पोखराको पर्यटन विकासमा यसको प्रभावबारे विचार व्यक्त गरेका थिए।

उडान सुरु भएसँगै पोखरा, गण्डकी प्रदेश र नेपालका लागि नयाँ अवसरहरुको ढोका खुल्ने विश्वास व्यक्त गरिएको छ। पोखराका व्यवसायीहरूले यसलाई ऐतिहासिक उपलब्धि सम्झदै, अन्तर्राष्ट्रिय सञ्जालमा पोखरालाई जोड्ने महत्वपूर्ण कदम भएको बताएका छन्। यसले पर्यटन र व्यवसायिक क्षेत्रलाई थप प्रवर्द्धन गर्ने अपेक्षा गरिएको छ।

यस अवसरमा सहभागी नेताहरूले भने, “पोखरा–दुबई नियमित उडानले नेपालको पर्यटन क्षेत्रलाई नयाँ उचाइमा पुर्याउनेछ। यसले अन्तर्राष्ट्रिय बजारमा पोखरालाई अझ प्रतिस्पर्धी बनाउनेछ।” साथै, व्यवसायीहरूले यस उडानलाई निरन्तरता दिन र यसको सफलताको लागि निजी क्षेत्र, गण्डकी प्रदेश सरकार र स्थानीय सरकारको सहयोग आवश्यक रहेको धारणा व्यक्त गरे।

यस्तै, छलफलको क्रममा दुबई जाने नेपाली कामदारका लागि लागू गरिएको ‘प्रहरी चारित्रिक प्रमाणपत्र’ प्रक्रिया तत्काल हटाउन सक्ने सम्भावना नभए पनि, पर्यटक भिसामा जाने यात्रुका लागि आवश्यक पर्ने यस प्रमाणपत्रको प्रक्रिया तत्काल हटाइदिन राजदूतसँग व्यवसायीहरूले अनुरोध गरेका थिए।

राजदूतले नेपाल र यूएई बीचको सहयोगलाई अझ सुदृढ बनाउने प्रतिबद्धता व्यक्त गर्दै, आवश्यक सहयोग र समन्वय गर्ने बताए। यस छलफलले पोखरा र नेपालका लागि अन्तर्राष्ट्रिय उडान र पर्यटनको नयाँ युगको शुरुआत हुन सक्ने संकेत गरेको छ।