मन्थलीमा १०२ छात्रालाई छात्रवृत्ति, दुई शिक्षकलाई २० हजार रुपैयाँसहित सम्मान

रामेछाप । मन्थली नगरपालिका–१, सानिमदौमा १०२ छात्रालाई छात्रवृत्ति प्रदान गरिएको छ। मन्थली–१ निवासी श्याम सुवेदी र उहाँको परिवारले ११ वर्षअघि सुरु गरेको छात्रवृत्ति कार्यक्रमअन्तर्गत यस वर्ष आठ विद्यालय तथा शैक्षिक संस्थामा अध्ययनरत छात्रालाई सहयोग गरिएको हो।

सानिमदौस्थित सामुदायिक भवनमा आइतबार आयोजित कार्यक्रममा २६ छात्रालाई पूर्ण र ७६ छात्रालाई आंशिक छात्रवृत्ति प्रदान गरियो। आर्थिक अभावका कारण पढाइमा समस्या भोग्न सक्ने छात्रालाई अध्ययनमा सहयोग पुर्‍याउने उद्देश्यले छात्रवृत्ति दिइएको आयोजकले जनाएको छ।

पूर्ण छात्रवृत्ति पाउने क्याम्पस तहका छात्रालाई जनही १८ हजार रुपैयाँ नगदसहित ट्र्याकसुट, ब्याग तथा कापी–कलम प्रदान गरिएको छ। विद्यालय तहका पूर्ण छात्रवृत्ति पाउने छात्राले जनही १० हजार रुपैयाँ नगदसहित ती शैक्षिक सामग्री पाएका छन्। आंशिक छात्रवृत्ति पाउने छात्रालाई ट्र्याकसुट, ब्याग र वर्षभरिका लागि पुग्ने कापी–कलम उपलब्ध गराइएको छ।

यस वर्ष मन्थली माध्यमिक विद्यालय, भैरवी माध्यमिक विद्यालय (सुनारपानी), तामाकोसी क्याम्पस (खिम्ती), सेतीदेवी माध्यमिक विद्यालय (सालु), सिद्धेश्वर माध्यमिक विद्यालय (गैराथोक), रामेछाप बहुप्राविधिक शिक्षालय, सहिद स्मृति क्याम्पस र मन्थली स्काउटका छात्राले छात्रवृत्ति पाएका छन्।

कार्यक्रममा विद्यार्थीको सिकाइ सुधारमा योगदान पुर्‍याएका दुई शिक्षकलाई पनि पुरस्कृत गरिएको छ। गणित विषयमा कमजोर विद्यार्थीलाई उत्कृष्ट नतिजा हासिल गर्न निरन्तर मेहनत गर्दै आएका खाँडादेवी माध्यमिक विद्यालय, चोप्राङका गणित शिक्षक सुबोध यादव र पशुपति माध्यमिक विद्यालय, भुलभुलेका अंग्रेजी शिक्षक प्रलाद खत्रीलाई जनही २० हजार रुपैयाँसहित सम्मान गरिएको हो।