हलेसी तुवाचुङमा धारिलो हतियार प्रहारबाट चारजना घाइते, ज्वाइँ पक्राउ

काठमाडौं । खोटाङको हलेसी तुवाचुङ नगरपालिका–३, आहालेमा धारिलो हतियार प्रहारबाट चारजना घाइते भएका छन्। घटनामा संलग्न रहेको आरोपमा ४३ वर्षीय नइन्द्रकुमार राई पक्राउ परेका छन्।

प्रहरीका अनुसार दशैं मनाउन ससुराली आएका राईले परिवारका सदस्यहरूमाथि आक्रमण गरेका हुन्। घाइते हुनेमा उनकी ४० वर्षीया श्रीमती अञ्जना राई, ६२ वर्षीया सासू स्यामाउन राई, ससुरा नरेन्द्र राई र २५ वर्षीया साली तेनिना राई छन्।

खोटाङका सूचना अधिकारी एवं प्रहरी निरीक्षक निराजन बस्नेतका अनुसार अञ्जना र तेनिनाको अवस्था गम्भीर छ। उनीहरूलाई उद्धार गरी उपचारका लागि नगर अस्पताल, दुर्छिम पठाइएको छ। आक्रमणमा प्रयोग गरिएको हतियार र घटनाको कारणबारे प्रहरीले अनुसन्धान गरिरहेको जनाएको छ।