तामाकोशी बाढीले दोलखाको किर्नेटारमा सडक पूर्णरूपले अवरुद्ध, यातायात सेवा प्रभावित

काभ्रेपलाञ्चोक – तामाकोशी नदीको बाढीले दोलखाको किर्नेटारमा सडक पूर्णरूपले अवरुद्ध भएको छ। बीपी राजमार्गको वैकल्पिक मार्गसमेत रहेको पुष्पलाल राजमार्गको किर्नेटार खण्ड कटान भएपछि, तराईलाई दोलखासँग जोड्ने सडक सम्पर्क पूर्णरूपमा टुटेको हो।

सडक अवरुद्ध हुँदा दोलखाबाट तराईसहित कोशी प्रदेशका जिल्लाहरू जस्ता पहाडी क्षेत्रको यातायात सेवा प्रभावित बनेको छ। साथै, दोलखाबाट तराई र कोशी प्रदेशका अन्य जिल्लाहरू जाने सवारीसाधन र सिन्धुली, रामेछाप हुँदै दोलखामा आउने सवारी साधनहरू समेत सञ्चालनमा आउन सकेका छैनन्।

जिल्ला प्रहरी कार्यालय दोलखाका प्रमुख डिएसपी मनोज लामाका अनुसार, बुधबार मध्यराति तामाकोशी नदीको बाढीले सडक भत्काएपछि यातायात पूर्णरूपमा बन्द भएको हो। उनले भने, “सडक खोल्नका लागि प्रयास भइरहेको छ। अहिले पालिका, सडक विभाग, खिम्ती जलविद्युत् आयोजनाका प्रतिनिधि, वडा अध्यक्ष र प्रहरी अधिकारीहरूबीच बैठक बसिरहेको छ। वैकल्पिक मार्ग खोल्ने र यातायात सञ्चालन गर्ने प्रयास जारी छ।”

यसअघि, बाढी र कटानका कारण केही दिनदेखि यातायात सेवा स्थगित भएको छ। स्थानीय प्रशासन र सम्बन्धित निकायहरू सडक मर्मत र पुनः सञ्चालनका लागि काम गरिरहेको छन्। यसले गर्दा स्थानीय जनता र व्यापार व्यवसाय प्रभावित भएका छन्।

प्रशासनले अवरुद्ध सडकलाई चाँडोभन्दा चाँडो सञ्चालनमा ल्याउने प्रयास गरिरहेको जनाएको छ। यद्यपि, आगामी दिनहरूमा मौसमको स्थिति हेरेर थप निर्देशन र सतर्कता अपनाइनेछ।