सप्तकोशीमा जेटबोट दुर्घटना: तीन जनाको मृत्यु, एक घाइते
- विराटनगर ।
- सप्तकोशी नदीमा भोजपुरबाट चतरा आउँदै गरेको जेटबोट दुर्घटना हुँदा तीन जनाको मृत्यु भएको छ भने एक जना घाइते भएका छन्।
विराटनगर । सप्तकोशी नदीमा भोजपुरबाट चतरा आउँदै गरेको जेटबोट दुर्घटना हुँदा तीन जनाको मृत्यु भएको छ भने एक जना घाइते भएका छन्।
जिल्ला प्रहरी कार्यालय धनकुटाका प्रमुख नारायण रञ्जितकारका अनुसार मृत्यु हुनेमा एक बालिका, एक महिला र एक पुरुष छन्। उनीहरूको पहिचान खुल्न बाँकी छ। प्रहरीका अनुसार अरुण र दूधकोशी नदीको त्रिवेणी क्षेत्रनजिकै जेटबोटको इन्जिन फेल भएको थियो। इन्जिन बन्द भएपछि बग्ने क्रममा बोट दुर्घटनामा परेको प्रारम्भिक जानकारी छ।
दुर्घटनाका बेला बोटमा १६ जना सवार रहेको बताइएको छ। तीमध्ये १२ जनाले मात्रै टिकट काटेको खुलेको प्रहरीले जनाएको छ। पाँच जना सकुशल घर फर्किसकेका छन् भने घाइते एक जनाको चतरा अस्पतालमा उपचार भइरहेको छ।
बोटका चालकलाई सुनसरी प्रहरीले नियन्त्रणमा लिएको छ। मृतकको पहिचान खुलाउने प्रयास भइरहेको र घटनाबारे थप अनुसन्धान भइरहेको रञ्जितकारले बताए। गत असारदेखि बन्द रहेको जेटबोट सेवा कात्तिक १ गतेदेखि पुनः सञ्चालनमा आएको थियो।
प्रतिक्रिया
यो पनि पढौँ
यो पनि पढौँ
