ललितपुरमा पहिलो पटक जावलाखेलमा सञ्चालनमा आएको ‘स्मार्ट सेफ्टी ब्यारेड’ले सडक दुर्घटना घटाउने अपेक्षा

काठमाडौँ — ललितपुर महानगरपालिकाले पैदलयात्रीको सुरक्षा सुनिश्चित गर्न र ट्राफिक नियमको प्रभावकारी कार्यान्वयन गर्न नेपालमै पहिलो पटक जावलाखेलमा ‘स्मार्ट सेफ्टी ब्यारेड’ सञ्चालनमा ल्याएको छ। यो प्रणालीले सडक दुर्घटना न्यूनिकरण गर्न महत्वपूर्ण भूमिका खेल्ने विश्वास गरिएको छ।

महानगरपालिकाका अनुसार, परीक्षणका रुपमा जडान गरिएको यस प्रणालीले ट्राफिक बत्तीसँग समन्वय गर्दै पैदलयात्रीलाई तोकिएको समयमा मात्रै जेब्रा क्रसिङ प्रयोग गर्न प्रोत्साहित गर्नेछ। जब ट्राफिक बत्ती हरियो हुन्छ, ब्यारेड स्वतः खुल्ने व्यवस्था छ भने रातो बत्ती बल्दा स्वतः बन्द हुने गरी यसको डिजाइन गरिएको छ। यसले सडक काट्ने प्रवृत्ति र अनावश्यक जोखिमलाई कम गर्न मद्दत गर्दछ।

सेन्सर प्रणाली जडान भएको यस ब्यारेडले पैदलयात्री बीचमै रहेका बेला स्वतः बन्द नहुने सुविधा पनि प्रदान गर्दछ। यसले सडक पार गरिरहेका व्यक्तिहरूलाई सुरक्षित रूपमा आवतजावत गर्न मद्दत पुर्‍याउने र सडक दुर्घटना सम्भावना घटाउने विश्वास लिइएको छ। साथै, महानगरले जेब्रा क्रसिङ बाहेक अन्य स्थानबाट सडक पार गर्ने प्रवृत्ति रोक्न सडकको दायाँ बायाँ गमला राख्ने तयारी पनि गरेको छ।

ललितपुर महानगरपालिकाका प्रमुख चिरिबाबु महर्जनले भने, “विगतमा ट्राफिक नियमको बेवास्ता र जेब्रा क्रसिङको उचित प्रयोग नहुँदा सडक दुर्घटना बढ्ने समस्या थियो। स्मार्ट सेफ्टी ब्यारेडले पैदलयात्री र सवारी चालक दुवैको लागि सुरक्षित र व्यवस्थित सडक वातावरण निर्माण गर्न मद्दत गर्नेछ।”

हाल जावलाखेलका दुई स्थानमा परीक्षणका रूपमा स्मार्ट सेफ्टी ब्यारेड जडान गरिएको छ। यदि यो सफल रहे, भने ललितपुर महानगरभित्र ट्राफिक लाइट भएका सबै चोकहरूमा यस प्रणालीको विस्तार गर्ने योजना छ।

तस्बिरहरू: नेपाल फोटो लाइब्रेरी