फुङ्लिङ नगरपालिका: स्थानीय महिला उद्यमीहरुले उत्पादन गरेको सामग्री विद्यार्थीलाई निशुल्क वितरण

फुङ्लिङ – फुङ्लिङ नगरपालिकाले स्थानीय उद्यमीहरुको उत्पादनलाई बजारमा प्रवर्द्धन गर्ने र महिला उद्यमीहरुलाई आत्मनिर्भर बनाउने उद्देश्यले नयाँ पहल सुरु गरेको छ। विगत दुई वर्षदेखि सञ्चालनमा आएको तालिम र सोही क्रममा उत्पादित सामग्रीको प्रयोग बढ्दै गएको छ।

वडा कार्यालयको समन्वयमा रेड पाण्डा नेटवर्क, हिमाली संरक्षण मञ्च, घरेलु तथा साना उद्योग कार्यालय, जिल्ला वन कार्यालय र फुङ्लिङ नगरपालिका स्वयंको आर्थिक तथा प्राविधिक सहयोगमा आयोजना गरिएको यो तालिमले स्थानीय महिलाहरुमा नयाँ सीप र आत्मविश्वास जगेर्ना गरेको छ।

यस तालिममा सहभागी महिलाहरुले फरुम्बो अल्लो कपडा उद्योग दर्ता गरी व्यवसायिक रुपमा सञ्चालन थालेका छन्। अहिले उनीहरुले कपडा, झोला, टोपी, गलबन्दी र रुमाल जस्ता वस्तु उत्पादन गर्न थालेका छन्। हिमाली संरक्षण मञ्चका कार्यक्रम संयोजक रमेश राईले यसलाई एउटा सफल उदाहरण भन्दै भने, “महिलाहरुको मेहनत र नगरपालिका र अन्य संस्थाहरुको सहयोगले गाउँको आर्थिक अवस्था बलियो बनिरहेको छ।”

वडा नं १० का वडाध्यक्ष सन्तोष लिम्बूले यसलाई निकै प्रेरणादायक कदम बताउँदै भने, “उद्यमीहरुलाई प्रोत्साहन गर्न र स्थानीय उत्पादनलाई बजारमा ल्याउन हाम्रो प्रयास निरन्तर रहनेछ।”

यसैबीच, वडा कार्यालयले उत्पादन गरेका झोलाहरु १६ महिलाहरुको समूहले तयार पारेका हुन्। ती झोलाहरुलाई फुङ्लिङ नगरपालिका-१० फुरुम्बुका विद्यार्थीहरुलाई स्थानीय विद्यालयहरूमा वितरण गरिएको हो। करिब पाँच लाख रुपैयाँको बजेटमा खरिद गरी बालकक्षा देखि कक्षा ५ सम्म अध्ययनरत विद्यार्थीलाई निशुल्क रुपमा उपलब्ध गराइएको छ।

फुङ्लिङ नगरपालिका प्रमुख अमिर मादेनले भने, “सिकेका सीपको सदुपयोग गर्न र स्थानीय उत्पादनलाई प्रोत्साहन गर्न हामी हाम्रै समर्पित छौं। यसले गाउँको आर्थिक समृद्धिमा ठूलो भूमिका खेल्ने विश्वास लिएका छौं।”

अहिले उद्योगले कपडा, झोला, टोपी, गलबन्दी र रुमाल जस्ता सामग्री उत्पादन गर्दै आएको छ, जुन स्थानीय तथा बाह्य बजारमा समेत राम्रो माग देखिएको छ। यस कार्यक्रमले गाउँका महिलाहरुको आत्मविश्वास र आत्मनिर्भरता बढाउने साथसाथै, गाउँको आर्थिक स्थायित्वमा समेत टेवा पुर्‍याएको छ।