रौतहटमा निर्वाचन सुरक्षा कडा, हवाई गस्ती समेत १० हजार भन्दा बढी सुरक्षाकर्मी परिचालन

रौतहट । रौतहटमा भोलि हुने प्रतिनिधि सभा सदस्य निर्वाचनलाई लक्षित गर्दै सुरक्षा व्यवस्था थप कडा बनाइएको छ। निर्वाचनलाई स्वतन्त्र, निष्पक्ष र शान्तिपूर्ण वातावरणमा सम्पन्न गर्न नेपाली सेनाले जिल्लाभर व्यापक सुरक्षा निगरानी सुरु गरेको हो।

जिल्लाका मतदान स्थल र संवेदनशील क्षेत्रहरूमा बख्तरबन्द गाडी, मोटरसाइकल र पैदल गस्ती परिचालन गरिएको छ। यसैबीच, मंगलबारदेखि हवाई गस्तीसमेत सञ्चालनमा आएको नारायण दल गणका प्रमुख कर्णेल विश्वाश विष्टले जानकारी दिए।

उनका अनुसार, एकीकृत निर्वाचन सुरक्षा योजनाअनुसार नेपाल प्रहरी र सशस्त्र प्रहरी बल नेपालसँग समन्वय गरी संयुक्त गस्ती सञ्चालन भइरहेको छ। कर्णेल विष्टले भने, “मतदाताले निर्धक्क भएर मतदान गर्न सकुन् भन्ने वातावरण तयार गरिएको छ।” साथै, उनले थपे, “कुनै पनि अवाञ्छित गतिविधि हुन नदिन सुरक्षा सतर्कता उच्च पारिएको छ।”

रौतहटका १८वटै पालिकामा हालसम्म ५३ सुरक्षा युनिट खडा गरिएको छ। जिल्लाका चारै निर्वाचन क्षेत्रमा मेजरको कमाण्डमा ७५० जना नेपाली सेना परिचालन गरिएको गणले जनाएको छ। यसअघि, रौतहटका प्रमुख जिल्ला अधिकारी दिनेश सागर भुसालले पत्रकार सम्मेलनमार्फत जिल्लाभर १०,००० भन्दा बढी सुरक्षा कर्मी परिचालन गरिएको जानकारी दिएका थिए।

निर्वाचन दिन सुरक्षा निकायहरूको समन्वित र उच्च सतर्कता अपनाई निर्वाचन शान्तिपूर्ण हुने विश्वास व्यक्त गरिएको छ।