खरेलले बिहीबार संयुक्त राष्ट्र सङ्घका उच्च पदस्थ प्रतिनिधिहरूसँग भेटवार्ता

काठमाडौं । सञ्चार तथा सूचना प्रविधिमन्त्री जगदीश खरेलले बिहीबार संयुक्त राष्ट्र सङ्घका उच्च पदस्थ प्रतिनिधिहरूसँग भेटवार्ता गर्नुभएको छ। मन्त्रालयमा सम्पन्न उक्त भेटवार्तामा संयुक्त राष्ट्र सङ्घकी नेपालका आवासीय संयोजक हन्ना सिङ्गर, संयुक्त राष्ट्रसङ्घीय विकास कार्यक्रम (यूएनडीपी) की आवासीय प्रतिनिधि क्योको योकोसुका, र संयुक्त राष्ट्रसङ्घीय शैक्षिक, वैज्ञानिक तथा सांस्कृतिक सङ्गठन (यूनेस्को) का प्रतिनिधि जाको डु ट्युइट सहभागी रहेका थिए।

भेटका क्रममा मन्त्री खरेलले नेपाल सरकारप्रति संयुक्त राष्ट्र सङ्घले पुर्‍याउँदै आएको सहयोगप्रति धन्यवाद व्यक्त गर्दै आगामी फागुन २१ गते निर्धारित निर्वाचन निष्पक्ष र भयरहित वातावरणमा सम्पन्न गर्न सरकार प्रतिबद्ध रहेको बताउनुभयो। उहाँले उक्त निर्वाचन सफल बनाउन संयुक्त राष्ट्र सङ्घलगायत विकास साझेदारहरूको सहयोग आवश्यक रहेको उल्लेख गर्नुभयो।

भेटवार्तामा विपद् व्यवस्थापन, डिजिटल रूपान्तरण, मिडिया साक्षरता प्रवर्द्धन, र सुशासन सुधारका क्षेत्रमा नेपाल सरकार र यूएनडीपीबीच सहकार्य गर्ने विषयमा विस्तृत छलफल भएको मन्त्रालयले जनाएको छ।

प्रतिनिधिहरूले पनि नेपाल सरकारको पहलको प्रशंसा गर्दै सहयोग जारी राख्ने प्रतिबद्धता जनाएका छन्। हन्ना सिङ्गरले नेपालले विपद् व्यवस्थापनमा देखाएको नेतृत्वको प्रशंसा गर्दै निर्वाचनलाई निष्पक्ष र सफल बनाउन सहयोग गर्ने प्रतिबद्धता जनाइन्। यूएनडीपीकी क्योको योकोसुकाले डिजिटल रूपान्तरण र मिडिया साक्षरता क्षेत्रमा साझेदारी अझ सशक्त बनाउने इच्छा व्यक्त गरिन् भने यूनेस्कोका जाको डु ट्युइटले सञ्चार र शिक्षा क्षेत्रमा सहकार्य निरन्तर जारी रहने बताए। मन्त्रालयका अनुसार भेटवार्ता आपसी समझदारी, साझेदारी र सहयोगको सकारात्मक वातावरणमा सम्पन्न भएको हो।