पर्साको सखुवा प्रसौनीमा जन्ती बोकेको कार दुर्घटना, एकको मृत्यु, एक जना गम्भीर घाइते

रौतहट – पर्साको सखुवा प्रसौनी गाउँपालिकामा सोमबार राति एक कार दुर्घटना हुँदा एक व्यक्तिको मृत्यु भएको छ भने अर्का एक जना गम्भीर घाइते भएका छन्।

प्राप्त जानकारी अनुसार, बहुदरमाई नगरपालिका–८ रामनगरीका साहेब सहनीको घरबाट सखुवा प्रसौनीको एकडरवा गाउँतर्फ जाँदै गरेको बीआर ०६४५ नम्बरको कार महुवनस्थित गण्डक नहर नजिक अनियन्त्रित भएर दुर्घटनामा परेको हो। दुर्घटना करिब ९ः१५ बजे राति भएको थियो। कार सडक छेउको पिपलको रूखमा ठोक्किएको थियो।

दुर्घटनामा गम्भीर घाइते भएका चालकलाई तत्काल उपचारका लागि बाराको नौतनस्थित एलएस न्युरो अस्पताल लैजाने क्रममा राति १०ः१५ बजे उनको मृत्यु भएको हो। प्रहरी नायब उपरीक्षक हरिबहादुर बस्नेतले मृतक चालकको नाम र ठेगाना अझै खुल्न नसकेको जानकारी दिए।

अर्का एक यात्री पनि गम्भीर घाइते भएका छन् र उनको उपचार जारी छ। प्रहरीले घटनाको थप अनुसन्धान गरीरहेको जनाएको छ। यस दुर्घटनाले स्थानीय बासिन्दा र यात्रुहरूमा त्रास बढाएको छ। प्रहरीले भने घटनाको थप विवरण र कारका चालकको बारेमा खोजी गरिरहेको जानकारी दिएको छ।