शेरबहादुर देउवा सिंगापुर उडे, चुनावअघि स्वास्थ्य उपचारका लागि विदेश यात्रा

काठमाडौं – नेपाली कांग्रेसका पूर्वप्रधानमन्त्री र अपदस्थ सभापति शेरबहादुर देउवा चुनावको मुखमा विदेश उडेका छन्। उनी बुधबार स्वास्थ्य उपचारका लागि सिंगापुर गएका हुन्।

स्रोतका अनुसार, देउवा परिवारका सदस्यसँगै फागुन २१ गते हुने प्रतिनिधिसभा सदस्य निर्वाचनको तयारीको अन्तिम चरणमा पुगेको बेला उनी सिंगापुर उडेका हुन्। त्रिभुवन अन्तर्राष्ट्रिय विमानस्थलबाट सिंगापुर एयरलाइन्सको उडानमार्फत उनी विदेश गएका हुन्।

उनी स्वास्थ्य उपचारका लागि उडेका स्रोतले जनाएको छ। यसअघि माघ १ गते सम्पन्न कांग्रेसको विशेष महाधिवेशनबाट गगन थापाको नेतृत्वमा नेपाली कांग्रेसको नयाँ कार्यसमिति चयन भएपछि देउवा राजनीतिक गतिविधिबाट टाढा बस्दै आएका छन्। निर्वाचन आयोगले थापाको नेतृत्वमा भएको महाधिवेशनबाट निर्वाचित समूहलाई आधिकारिकता दिएसँगै देउवा कुनै सार्वजनिक कार्यक्रममा देखिएका छैनन्।

यसअघि भदौ २३ र २४ गते भएको जेनजी आन्दोलनको क्रममा कुटपिटमा परेपछि उनी उपचारका लागि सिंगापुर पुगेका थिए। स्रोतका अनुसार, यसपटक पनि उनी उपचारको फलोअपका लागि फेरि सिंगापुर उडेका हुन्।

यस पटक कांग्रेसले देउवालाई निर्वाचनमा उम्मेदवार बनाएको छैन। उनी राजनीतिक कार्यक्रममा सक्रिय नभए पनि स्वास्थ्य उपचारका लागि विदेश यात्रा जारी रहेको छ।