मधेस प्रदेशमा नयाँ सरकार गठनको प्रक्रिया सुरु: मुख्यमन्त्री यादवको राजीनामापछि धारा १६८(२) सक्रिय

जनकपुरधाम । मधेस प्रदेशका मुख्यमन्त्री सरोजकुमार यादवले पदबाट राजीनामा दिएसँगै अब संविधानको धारा १६८(२) बमोजिम नयाँ सरकार गठनको बाटो खुलेको छ। सर्वोच्च अदालतको परमादेशअनुसार विश्वासको मत लिन बोलाइएको प्रदेशसभा बैठकमा बहुमत नपुग्ने स्पष्ट भएपछि उनले बुधबार रोष्टममै उभिएर पदत्याग गरेको घोषणा गरेका हुन्।

विश्वासको मत लिने तय भएको बैठकलाई सम्बोधन गर्ने क्रममा मुख्यमन्त्री यादवले मार्गप्रशस्त गर्ने उद्देश्यले राजीनामा दिएको बताए। उनको मन्तव्य सुरु भएलगत्तै विपक्षी सात दलका सांसदहरूले बैठक बहिष्कार गर्दै सभाकक्षबाट बाहिरिएका थिए, जसले यादव बहुमत जुटाउन असमर्थ भएको संकेत झनै प्रष्ट बनायो।

सत्ता साझेदार दलको समर्थन मात्रले विश्वासको मत प्राप्त नहुने स्थिति बनेपछि उनले पदबाट हट्ने निर्णय सार्वजनिक रूपमा घोषणा गरेका हुन्। यसैसँग, मधेस प्रदेशमा नयाँ राजनीतिक समीकरणका लागि वातावरण तयार भएको छ।

यसअघि तत्कालीन प्रदेश प्रमुख सुमित्रा सुवेदी भण्डारीले कात्तिक २३ गते यादवलाई संविधानको धारा १६८(३) अन्तर्गत सबैभन्दा ठूलो दलको नेताका रूपमा मुख्यमन्त्री नियुक्त गरेकी थिइन्। तर, उक्त नियुक्ति असंवैधानिक भएको दाबी गर्दै सात दलका ७४ जना प्रदेशसभा सदस्यहरूले सर्वोच्च अदालतमा रिट दायर गरेका थिए।

सोही रिटमाथि मंसिर १५ गते सुनुवाइ गर्दै सर्वोच्च अदालतले मुख्यमन्त्री यादवलाई २४ घण्टाभित्र विश्वासको मत लिने आदेश दिएको थियो। आदेश कार्यान्वयनका लागि आज बसेको प्रदेशसभा बैठकमा यादव बहुमत हासिल गर्न असफल रहे, जसपछि उनले सभामै राजीनामा घोषणा गर्दै आजै प्रदेश प्रमुखसमक्ष लिखित राजीनामा बुझाउने बताए।

यादवको राजीनामापछि अब प्रदेश प्रमुखले संविधानको धारा १६८(२) अनुसार दुई वा दुईभन्दा बढी दलको समर्थनमा नयाँ सरकार गठनका लागि आह्वान गर्ने प्रक्रिया अघि बढाउनेछन्। त्यसका लागि दलहरूबीच छलफल र नयाँ सत्ता समीकरण बन्ने प्रयास तीव्र हुने अपेक्षा गरिएको छ।