बलिउडका दिग्गज अभिनेता धर्मेन्द्रको ८९ वर्षको उमेरमा निधन

काठमाडौँ । बलिउडका वरिष्ठ तथा दिग्गज अभिनेता धर्मेन्द्रको ८९ वर्षको उमेरमा निधन भएको भारतीय सञ्चारमाध्यमहरूले जनाएका छन्। भारतीय फिल्म उद्योगमा ‘हे–म्यान’को पहिचान बनाएका धर्मेन्द्रको निधन सोमबार अपराह्न आफ्नै मुम्बईस्थित निवासमा भएको बताइएको छ।

धर्मेन्द्रका पारिवारिक सदस्य र नजिकका स्रोतहरूले उनी केही समयदेखि स्वास्थ्य समस्याबाट पीडित रहेको उल्लेख गरे पनि मृत्युको आधिकारिक कारण भने सार्वजनिक गरिएको छैन।

करण जोहरले निधनको पुष्टि

ख्यातिप्राप्त बलिउड निर्माता तथा निर्देशक करण जोहरले सामाजिक सञ्जालमार्फत धर्मेन्द्रको निधन पुष्टि गर्दै भावपूर्ण श्रद्धाञ्जलि व्यक्त गरेका छन्।
जोहरले लेखेका छन्,

“धर्मेन्द्रजीको निधनले एक युगको अन्त्य भएको छ। उहाँ मुख्यधारको भारतीय सिनेमाका साँचैका हिरो हुनुहुन्थ्यो। उहाँले निर्माण गरेको पहिचान र उहाँको योगदान इतिहासमा सधैँ उज्यालो भएर रहनेछ।”

उनको यो श्रद्धाञ्जलि पछि बलिउडका अन्य कलाकार, निर्देशक तथा निर्माताहरूले पनि सामाजिक सञ्जालमार्फत दुःख व्यक्त गर्दै श्रद्धाञ्जलि दिएका छन्।

हेमा मालिनी, अमिताभ बच्चनसहित धेरै कलाकार आर्यघाटमा उपस्थिति

धर्मेन्द्रप्रति अन्तिम विदाइ दिन बलिउडका दिग्गज कलाकारहरू हेमा मालिनी, अमिताभ बच्चन, आमिर खानलगायत धेरै कलाकारहरू आर्यघाट पुगेका छन्।

धर्मेन्द्रलाई अन्तिम श्रद्धाञ्जलि दिन ठूलो संख्यामा प्रशंसक, कलाकार तथा उद्योगका व्यक्तित्वहरू उपस्थित भएको भारतीय मिडियाले जनाएको छ।

अन्तिम क्षण पहिलेदेखि सुरक्षा कडा

उनको निवास बाहिर सोमबार बिहानैदेखि एम्बुलेन्स, प्रहरी टोली र सुरक्षा व्यवस्थामा सक्रियता देखिएको थियो। घर वरपर सर्वसाधारणको भीड बढ्न थालेपछि अतिरिक्त सुरक्षा व्यवस्था मिलाइएको मिडियाले जनाएको छ।

बलिउडमा करिब छ दशक लामो अभिनय यात्रामा सयौँ सफल फिल्म दिएका धर्मेन्द्रलाई भारतीय चलचित्र इतिहासकै सबैभन्दा करिश्माई अभिनेतामध्ये एक मानिन्छ।