सेती नदीमा पहिरो र चट्टान खसेपछि जोखिम न्यूनीकरणका लागि तत्काल कदमहरू; प्रशासनको निर्देशन

कास्की — पोखरा महानगरपालिका–१५ र १७ को बीचबाट बग्ने सेती नदीमा चट्टानसहितको पहिरो खसेर नदीको बहाव प्रभावित भएपछि स्थानीय प्रशासनले तत्कालै जोखिम न्यूनीकरण, क्षति मूल्यांकन र पुनर्निर्माणका काम सुरु गर्न निर्देशन दिएको छ। रातो पैह्रास्थित सेतीको डिल भत्किएर नदीको बहाव अवरुद्ध भएपछि प्रमुख जिल्ला अधिकारी कुमानसिंह गुरूङको नेतृत्वमा स्थलगत निरीक्षण गरिएको हो।

सहायक प्रमुख जिल्ला अधिकारी चित्रांगत बरालका अनुसार, निरीक्षणका क्रममा तत्काल ठूलो जोखिम देखिएन। तर, प्रविधिक अध्ययन र नियन्त्रणको जिम्मेवारी प्रविधिक निकायलाई दिइएको छ। सशस्त्र प्रहरी बलले ड्रोनमार्फत जोखिम क्षेत्रको अध्ययन गरिरहेको उनले बताए।

जिल्ला सुरक्षा समितिको साउन ३ गते बसेको बैठकको निर्णय कार्यान्वयनका लागि जिल्ला प्रशासन कार्यालयले पोखरा महानगरपालिका, सिँचाइ तथा जलस्रोत व्यवस्थापन आयोजना र अन्नपूर्ण गाउँपालिकालाई छुट्टाछुट्टै पत्राचार गरेको छ। पत्रमा, सेती नदीमा भएको पहिरो र चट्टानको अवरोधको विषयमा तत्काल प्राविधिक अध्ययन गर्न र दीर्घकालीन जोखिम व्यवस्थापनका उपायहरू अपनाउन निर्देशन दिइएको छ।

यसै गरी, नदी किनारामा परेको तत्कालीन प्रभाव, जोखिम क्षेत्रको पहिचान, दीर्घकालीन असर, र जोखिम न्यूनीकरणका उपायहरू समेटिएको विस्तृत अध्ययन प्रतिवेदन तयार गर्न पनि भनिएको छ। प्रशासनले पोखरा महानगरपालिका र सिँचाइ आयोजना बीच समन्वय गरेर जोखिमको नियन्त्रण र रोकथामका कार्यहरू तिब्रता दिन निर्देशन दिएको छ।

अन्नपूर्ण गाउँपालिकालाई पनि बाढी र पहिरोबाट भएको क्षतिको विस्तृत विवरण, राहत र पुनर्निर्माणका लागि आवश्यक प्राविधिक लागत अनुमानसहितका कागजात जिल्ला विपद् व्यवस्थापन समितिबाट अनुमोदन गरी पठाउन अनुरोध गरिएको छ। यसरी, प्रभावित क्षेत्रहरूमा राहत, पुनर्स्थापना र पुनर्निर्माणका कामहरू छिटो अघि बढाउन र सबै निकायबीच समन्वय कायम गर्न प्रशासनले जोड दिएको छ।

प्रशासनको यस कदमले सेती नदीको जोखिमपूर्ण क्षेत्रलाई सुरक्षित बनाउने र दीर्घकालीन रूपमा जोखिम न्यून गर्ने उद्देश्य राखिएको छ।