सिरहामा शीतलहरका कारण जनजीवन प्रभावित, राहतकार्य शुरु

सिरहा – लगातार परेको शीतलहरका कारण सिरहामा जनजीवन गम्भीर रूपमा प्रभावित भएको छ। चिसो हावाले लहान बजारसहित ग्रामीण क्षेत्रको दैनिक जीवन निकै कष्टकर बनाएको छ। विशेषगरी बालबालिका, वृद्धवृद्धा र विपन्न समुदाय सबैभन्दा बढी प्रभावित भएका छन्।

बिहानैदेखि घुर तापेर बस्ने क्रम जारी रहँदा विद्यालयमा विद्यार्थीकाको उपस्थिति समेत घट्दै गएको छ। चिसोको प्रभाव बढ्दै जाँदा लहान नगरपालिकाले तत्काल राहतकार्य सञ्चालन गरेको छ। नगरपालिकाका प्रमुख महेशप्रसाद चौधरीले ग्रामीण क्षेत्रका विभिन्न चोकचोकमा दाउरा बाल्ने व्यवस्था सुरु भएको जानकारी दिए।

उनले भने, “बढ्दो चिसोबाट नगरवासीलाई जोगाउन हामीले बजार क्षेत्रका प्रमुख चोकहरूमा दाउरा बाल्ने काम थालेका छौँ। वडासँग समन्वय गरेर २४ वटै वडाका आवश्यक स्थानहरूमा दाउरा वितरण गर्ने तयारी भइरहेको छ।” साथै, गरिब र विपन्न परिवारहरूलाई लक्षित गरी ५०० परिवारलाई फाइबरका सिरक वितरण गरिने तयारी पनि भएको छ।

यसैबीच, विद्यालयहरूमा चिसोको प्रभाव देखिएको छ। मध्यिक विद्यालय पडरिया थारू टोलका प्रधानाध्यापक मनोज यादवले भन्नुभयो, “अत्यधिक चिसोका कारण विशेषगरी विपन्न परिवारका बालबालिकाहरूको न्यानो लुगाको अभावले विद्यालयमा नियमित उपस्थितिमा कमी आएको देखिन्छ।”

साथै, डिभिजन वन कार्यालय लहानले जाडो छल्न दाउरा व्यवस्थापनमा सहयोग गरिरहेको छ। कार्यालयका सूचना अधिकारी राधेश्याम चौधरीका अनुसार जिल्लाका मुख्य बजार क्षेत्रमा दाउरा उपलब्ध गराउन पाँच लाख रुपैयाँ बजेट विनियोजन गरिएको छ।

जिल्ला विपद् व्यवस्थापन समितिको बैठक चाँडै बस्ने तयारी भइरहेको सहायक प्रमुख जिल्ला अधिकारी चेतराज बरालले जानकारी दिए। उहाँका अनुसार, प्रमुख स्थानीय तहका अधिकारीहरूका साथ छलफल भइरहेको र आवश्यक निर्णयहरू गरी तत्काल कार्यान्वयन गरिनेछ।

लगातारको शीतलहरले प्रभावित भएको जनजीवनलाई मध्यनजर गर्दै सरकारी निकाय र स्थानीय तहले सक्रियता बढाएका छन्। यस प्रकारको राहतकार्यले प्रभावित समुदायलाई केही राहत मिल्ने विश्वास गरिएको छ।