माई मार्टले अनलाइन किनमेल र द्रुत डेलिभरी सेवा सुरु, स्थानीय उत्पादनलाई प्रवर्द्धन गर्दै

काठमाडौँ — प्रमुख खुद्रा व्यवसायी संस्था माई मार्टले आफ्नो सेवा विस्तार गर्दै उपभोक्तासम्म सिधै अनलाइन किनमेल सेवा सुरु गरेको छ। नयाँ मोबाइल एप “माई मार्ट – डेलिभर्ड इन मिनेट्स” मार्फत ग्राहकहरूले दैनिक उपभोग्य सामग्रीहरू सोही दिनै घरसम्म पाउने सुविधा पाउने छन्।

डिजिटल प्रविधि र बदलिँदो किनमेल व्यवहारलाई ध्यानमा राख्दै, माई मार्टले द्रुत डेलिभरीसहितको डाइरेक्ट टु कन्ज्युमर (D2C) मोडेल सञ्चालनमा ल्याएको हो। यसअघि व्यवसाय–देखि–व्यवसाय (B2B) मोडेलमार्फत सेवा दिँदै आएको कम्पनीले अब उपभोक्तामैत्री सेवा थप गरेको हो।

कम्पनीका अनुसार, बजारको माग, आन्तरिक तयारी र आपूर्ति प्रणालीको सफल परीक्षणपछि मात्र यो सेवा लागू गरिएको हो। मोबाइल एप, अर्डर व्यवस्थापन, स्टक कन्ट्रोल र डेलिभरी प्रणाली पूर्ण रूपमा तयार भएको कम्पनीले जनाएको छ।

हालसम्म यो सेवा काठमाडौँ उपत्यकाका विभिन्न क्षेत्रमा उपलब्ध रहेको छ भने भविष्यमा अन्य शहरहरूमा समेत विस्तार गर्ने योजना रहेको छ। साथै, माई मार्टले नेपाली उद्यमशीलता र स्वरोजगारी प्रवर्द्धन गर्न पनि ध्यान केन्द्रित गरेको छ।

यस नयाँ मोडेलले स्थानीय उत्पादनलाई प्राथमिकता दिँदै, स्वदेशी उत्पादकहरूलाई डिजिटल बजारसँग जोड्ने लक्ष्य राखेको छ। यसले उत्पादनलाई उचित मूल्य र सुनिश्चित बजार उपलब्ध गराउने उद्देश्यले स्थानीय व्यवसायसँग सहकार्य विस्तार गरिरहेको छ।

माई मार्टको मोबाइल एप अहिले गुगल प्ले स्टोर र एप्पल एप स्टोरमा उपलब्ध छ। यसले स्वरोजगारी, रोजगारी सिर्जना, डिजिटलाइज्ड स्थानीय व्यवसाय र उपभोक्तालाई छिटो, सहज र भरपर्दो सेवा प्रदान गर्न मद्दत पुर्‍याउने विश्वास कम्पनीको छ।

माईमार्ट इन्डस्ट्रिज प्रा. लि., आई.एम.ई. ग्रुप अन्तर्गतको संस्था हो। यसले २०७३ सालदेखि काठमाडौँ उपत्यकामा दैनिक उपभोग्य सामग्रीको थोक कारोबार गर्दै आएको छ र हालसम्म ३,००० भन्दा बढी किराना तथा ग्रोसरी पसलहरूसँग प्रत्यक्ष सहकार्य गरिरहेको छ।

यस नयाँ सेवाले नेपाली बजारमा डिजिटल व्यापार र स्थानीय उत्पादनको प्रवर्द्धनमा नयाँ आयाम थप्ने अपेक्षा गरिएको छ।