नयाँ पत्रिका कार्यालयमा पत्रकार पक्राउ गर्न खोजेको घटनाबारे प्रहरीको विज्ञप्ति हटाइयो

काठमाडौं । पत्रकार पक्राउ गर्न खोजिएको घटनाबारे नेपाल प्रहरीले स्पष्टीकरण दिँदै जारी गरेको विज्ञप्ति हटाएको छ। प्रवक्ता अभिनारायण काफ्लेले गएराति १ः४० बजे ह्वाट्सएप समूहमा पठाएको विज्ञप्ति प्रहरीले शनिबार बिहान हटाएको हो।

विज्ञप्तिमा सञ्चारकर्मीलाई साइबर ब्युरोमा बोलाउनु प्रहरीको नियमित कार्यसम्पादनअन्तर्गतको कदम भएको र यसको उद्देश्य प्रेस स्वतन्त्रतामाथि हस्तक्षेप गर्नु नभएको दाबी गरिएको थियो। प्रहरीविरुद्ध सामाजिक सञ्जाल र सञ्चारमाध्यममा फैलिएका समाचार तथा सन्देशको सत्यता, तथ्यपरकता र कानुनी आधारबारे सामान्य जानकारी लिन सञ्चारकर्मीलाई बोलाइएको विज्ञप्तिमा उल्लेख थियो।

शुक्रबार नेपाल प्रहरीले नयाँ पत्रिका कार्यालयमा करिब साढे दुई घण्टा घेराउ गर्दै पत्रकार पक्राउ गर्न खोजेको थियो। केही पत्रकारलाई पक्राउ गरेपछि छाडिएको थियो।

घटनाबारे प्रधानमन्त्रीको सचिवालय र सत्तारूढ राष्ट्रिय स्वतन्त्र पार्टी (रास्वपा) ले अनभिज्ञता जनाएको थियो। तर प्रहरीले राति जारी गरेको विज्ञप्तिमा प्रधानमन्त्री कार्यालयको चासोपछि साइबर ब्युरोले सञ्चारकर्मीलाई बोलाएको उल्लेख थियो।

प्रहरीका अनुसार सामाजिक सञ्जाल र सञ्चारमाध्यममा प्रहरीविरुद्ध गलत समाचार तथा सन्देश निरन्तर फैलिएको विषयमा प्रधानमन्त्री कार्यालयले चासो व्यक्त गरेको थियो। त्यसले प्रहरीको व्यावसायिकता, सर्वसाधारणको विश्वास, सरकार र प्रहरी संगठनबीचको सम्बन्ध तथा अनुसन्धान प्रक्रियामा नकारात्मक असर पर्न सक्ने प्रहरीको भनाइ थियो।

विज्ञप्तिमा नेपाल प्रहरी प्रेस स्वतन्त्रता र सञ्चारकर्मीको सुरक्षाप्रति प्रतिबद्ध रहेको पनि उल्लेख गरिएको थियो। तथापि, विज्ञप्ति हटाइएको विषयमा प्रहरीले छुट्टै स्पष्टीकरण दिएको छैन।