सुमेरु सहकारीको सम्पत्ति लिलामीको म्याद १५ दिन थपियो

काठमाडौँ । बागमती प्रदेश सरकारअन्तर्गतको समस्याग्रस्त सहकारी व्यवस्थापन समितिले सुमेरु बचत तथा ऋण सहकारी संस्थाको सम्पत्ति लिलाम बिक्रीका लागि आवेदन दिने म्याद १५ दिन थपेको छ।

समितिले यसअघि असोज १७ गते ३५ दिने लिलामी सूचना प्रकाशित गरेको थियो। सम्पत्ति र लिलामीका सर्तमा प्राविधिक कारणले केही संशोधन गर्नुपर्ने भएपछि म्याद थप गरिएको सूचनामा उल्लेख छ। अब इच्छुक खरिदकर्ताले पहिलो सूचना प्रकाशित भएको मितिले ५० दिनभित्र सिलबन्दी बोलपत्र पेस गर्न सक्नेछन्।

ललितपुरको पुल्चोकस्थित सुमेरु सहकारीलाई समस्याग्रस्त घोषणा गरेपछि बचतकर्ताको रकम फिर्ता गर्ने र सम्बन्धित कम्पनीको बैंक ऋण भुक्तानी गर्ने प्रयोजनले समितिले सम्पत्ति लिलाम गर्न लागेको हो।

लिलामी सूचीमा सुमेरु सिटी अस्पताल प्रालिको नाममा ललितपुर महानगरपालिका–३ मा रहेका नौ कित्ता जग्गा, ती जग्गामा बनेका भवन तथा अन्य संरचना समावेश छन्। बायोमेडिकल इन्जिनियरबाट मूल्याङ्कन गरिएका अस्पतालका पुँजीगत सामग्री र उपकरण पनि बिक्रीमा राखिएका छन्।

यसैगरी, सुमेरु अस्पतालको सञ्चालन अनुमतिपत्र र शंखरापुर कलेजको सञ्चालन अनुमतिपत्रसमेत लिलामी सूचीमा छन्। कलेजका शैक्षिक कार्यक्रम सञ्चालन गर्न प्रयोग हुँदै आएका चल सम्पत्ति पनि लिलाम गरिने समितिले जनाएको छ।