बाढीपहिरोले पृथ्वी राजमार्गसहित १२ भन्दा बढी सडकखण्ड अवरुद्ध

काठमाडौँ । अविरल वर्षापछि आएको बाढी र पहिरोका कारण पृथ्वी राजमार्गसहित देशका १२ भन्दा बढी सडकखण्ड अवरुद्ध भएका छन्। प्रहरी प्रधान कार्यालयका अनुसार विभिन्न स्थानमा पहिरो, लेदो र बढेको पानीको बहावका कारण सडकमा यातायात पूर्ण रूपमा बन्द भएको छ।

धादिङको गजुरी गाउँपालिका–२ स्थित परेवाभिरमा पहिरो खसेपछि पृथ्वी राजमार्ग दुवैतर्फ पूर्ण रूपमा अवरुद्ध भएको छ। त्यस्तै, काभ्रे खण्डको बीपी राजमार्गमा पनि यातायात रोकिएको छ। बिहान ४ः५५ बजेदेखि रोशी गाउँपालिका–९, पिन्थली र वडा नम्बर ८ को गिम्दीबेँसीमा खहरेखोलाबाट ढुङ्गा, माटो र लेदो बगेर आएपछि सडक पूर्ण रूपमा बन्द भएको प्रहरीले जनाएको छ।

सुर्खेतको बराहताल गाउँपालिका–७, औलिसेमा सडक माथिबाट आएको सुक्खा पहिरोले कर्णाली राजमार्ग अवरुद्ध भएको छ। मध्यपहाडी राजमार्गको खोटाङ खण्डमा पनि यातायात प्रभावित भएको छ। यस्तै, ललितपुरको बागमती खोला करिडोर र कान्ति लोकपथका विभिन्न खण्डमा आवागमन बन्द भएको छ।

ललितपुर महानगरपालिका–२, बल्खुस्थित सुन्दरीघाट करिडोरमा अविरल वर्षाका कारण पानीको बहाव बढेपछि सडक पूर्ण रूपमा अवरुद्ध भएको प्रहरी प्रधान कार्यालयले जनाएको छ।

कालीगण्डकी करिडोरअन्तर्गत गुल्मीको कालीगण्डकी गाउँपालिका–२, राक्सेमा लेदोसहितको पहिरो खसेर सडक बन्द भएको छ। पाल्पाको रामपुर नगरपालिका–१, कासिबनमा पनि ढुङ्गासहितको पहिरो खसेपछि करिडोरको पक्की सडक पूर्ण रूपमा अवरुद्ध भएको छ। मुगुको छायाँनाथ रारा नगरपालिका–७, ताल्चास्थित नाग्म–गमगढी सडकखण्डसमेत अवरुद्ध रहेको प्रहरीले जनाएको छ।