विनाकारण भीआईपी पक्राउ गरे सरकारले ठूलो मूल्य चुकाउनुपर्छ : प्रचण्ड

काठमाडौं । नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ले विनाकारण विशिष्ट व्यक्ति (भीआईपी)हरूलाई पक्राउ गर्ने क्रम जारी रहे सरकारले ठूलो मूल्य चुकाउनुपर्ने चेतावनी दिएका छन्।

सोमबार संघीय संसद् भवन, सिंहदरबारमा सञ्चारकर्मीसँग कुरा गर्दै प्रचण्डले सरकारले ‘छोरी पिटेर बुहारी तर्साउन’ खोजेको हो भने त्यो सरकारकै लागि घातक हुने बताए। उनले यस्ता घटना नदोहोर्‍याउन सरकारलाई आग्रहसमेत गरे।

“तथ्य विस्तारै आउँछ। सरकारले छोरी पिटेर बुहारी तर्साउन खोजेको हो भने त्यो पनि घातक हुन्छ,” उनले भने। ‘सुरक्षा थ्रेट’ देखाएर गरिएको पक्राउको औचित्य नरहेको प्रचण्डको भनाइ थियो। साँच्चै सुरक्षा जोखिम थियो भने पक्राउ गर्नुको सट्टा सम्बन्धित व्यक्तिको घरमा सुरक्षाकर्मी थप्नुपर्ने उनले तर्क गरे।

“त्यो सुरक्षा थ्रेट भन्ने बहानाबाजी हो। लाटोले पनि बहानाबाजी हो भन्ने बुझ्छ। सुरक्षा थ्रेट हो भने सुरक्षाकर्मी बढाइदिनुपर्‍यो नि,” प्रचण्डले भने। संयुक्त राष्ट्रसंघको महासभामा प्रधानमन्त्रीले दिएको अभिव्यक्तिबारे पनि प्रचण्डले प्रतिक्रिया दिएका छन्। प्रधानमन्त्रीले त्यस अवसरमा बोल्नुपर्ने विषय नै उठाएको भन्दै उनले त्यसलाई स्वाभाविक बताएका हुन्।

यस विषयलाई अनावश्यक रूपमा बढाइचढाइ गर्न आवश्यक नरहेको उल्लेख गर्दै उनले प्रधानमन्त्री बालेनको ठाउँमा अरू कोही भएको भए पनि त्यही कुरा बोल्ने धारणा राखे।