मिटरब्याज पीडितहरूको काठमाडौं केन्द्रित मार्च प्रभावित, वर्षाका कारण यात्रा चपुरमै रोकिए

जनकपुरधाम । काठमाडौं केन्द्रित पैदल मार्चमा रहेका मिटरब्याज पीडितहरूको यात्रा वर्षाको कारण प्रभावित बनेको छ। आइतबार राति रौतहटको चपुर पुगेर धर्मशालामा रात बिताएका उनीहरू बिहान ५ बजे हिँड्ने योजना बनाएका थिए। तर, रातिदेखि परेको मुसलधारे वर्षा र छाताको अभावका कारण यात्रा प्रभावित भएको मिटरब्याज पीडितकी अभियन्ता लक्ष्मी घिमिरेले जानकारी दिइन्।

घिमिरेका अनुसार करिब १०० देखि १५० जना पीडितहरूको लागि पर्याप्त छाता व्यवस्था गर्न सके Marchअगाडि बढाउने योजनामा थिए। उनका अनुसार टोलीमा रहेका केही व्यक्तिसँग मात्र छाता रहेकाले अधिकांश सहभागी वर्षामा निस्कन सक्ने स्थिति छैन। ‘हाम्रो समूहमा वृद्धवृद्धा, बाबुआमा पनि हुनुहुन्छ। उनीहरूका लागि छाताको व्यवस्था गर्ने प्रयास गरिरहेका छौं, तर अहिलेसम्म पर्याप्त छाता उपलब्ध हुन सकेको छैन,’ उनले भनिन्।

उनका अनुसार अघिल्ला दिनहरूमा वर्षामा भिज्दै र प्रचण्ड घाम सहँदै यात्रा गर्नुपरेकोले केही महिला बिरामी समेत परेको अवस्था छ। यसैले अहिलेको वर्षामा थप जोखिम नहोस् भनेर केहीबेरका लागि मार्च रोकिएको हो।

मिटरब्याज पीडितहरूले असार २५ गते जनकपुरधामको तिरहुतिया गाछीबाट काठमाडौं केन्द्रित पैदल मार्च सुरु गरेका हुन्। सरकारसँग भएका सम्झौता कार्यान्वयन, मिटरब्याजसम्बन्धी फर्जी लिखत खारेज, विशेष ऐन निर्माण, विशेष न्यायाधिकरण गठन लगायत ६ बुँदे मागसहित उनीहरू सिंहदरबारसम्म पुग्ने तयारीमा छन्।

यात्राका क्रममा लगातारको पैदल हिँडाइ, चर्को घाम र वर्षाका कारण धेरै सहभागीको स्वास्थ्यमा असर परेको छ। कतिपयको खुट्टा सुन्निएको, फोका उठेको र घाउसमेत लागेको भए पनि उनीहरूले आन्दोलनलाई निरन्तरता दिएका छन्।