दूरसञ्चार सेवाको गुणस्तर सुधार्न मन्त्री तिमिल्सिनाको निर्देशन

काठमाडौं । सूचना तथा सञ्चारमन्त्री डा. विक्रम तिमिल्सिनाले दूरसञ्चार सेवाको गुणस्तरबारे नेपाल दूरसञ्चार प्राधिकरणसँग जानकारी लिँदै नियमित अनुगमन प्रतिवेदन मन्त्रालयमा पेस गर्न निर्देशन दिएका छन्।

टेलिफोन र इन्टरनेट सेवाको गुणस्तर कमजोर भएको भन्दै उपभोक्ताका गुनासा नघटेको सन्दर्भमा मन्त्री तिमिल्सिनाले आज प्राधिकरणका पदाधिकारीसँग सेवा अवस्था, गुणस्तर परीक्षण, नियमन र सेवा विस्तारबारे छलफल गरेका हुन्।

छलफलमा सञ्चार सचिव राजेन्द्रकुमार पौडेल, प्राधिकरणका अध्यक्ष अर्जुन घिमिरेलगायत मन्त्रालय तथा प्राधिकरणका पदाधिकारी सहभागी थिए। मन्त्री तिमिल्सिनाले दूरसञ्चार सेवाको गुणस्तर खस्किएको उपभोक्ताको बुझाइ रहेको र काठमाडौं उपत्यकाजस्तो क्षेत्रमा समेत टेलिफोन तथा इन्टरनेट सेवा कमजोर हुनु गम्भीर विषय भएको बताए।

“दूरसञ्चार सेवाको पहुँच र गुणस्तर कमजोर भयो भन्ने गुनासो अझै हट्न सकेको छैन। यसमा जसरी पनि सुधार गर्नैपर्छ,” उनले भने, “नागरिकका आकांक्षा पूरा गर्ने गरी काम गर्नुको विकल्प छैन।”

नागरिकले अपेक्षा गरेअनुसार भरपर्दो, गुणस्तरीय र सहज दूरसञ्चार सेवा उपलब्ध गराउन नियामक निकाय र सेवा प्रदायक दुवै जिम्मेवार हुनुपर्ने उनको भनाइ थियो।

बैठकमा प्राधिकरणका पदाधिकारीले गुणस्तर परीक्षण तथा अनुगमनका क्रममा देखिएका समस्या र चुनौतीबारे जानकारी गराएका थिए। प्राधिकरणका अनुसार गुणस्तर परीक्षणका लागि आवश्यक सवारीसाधन र ड्राइभ टेस्ट उपकरण पर्याप्त छैनन्। परीक्षणका लागि आवश्यक क्षमता तथा उपकरणको अभाव र उपकरण खरिदका केही पुराना प्रक्रिया कानुनी विवादमा पर्नुले अनुगमनमा कठिनाइ भएको जनाइएको छ।

प्राधिकरणका अध्यक्ष घिमिरेले देशभर दूरसञ्चार सेवाको नियमित अनुगमन तथा निरीक्षण भइरहेको बताए। टेलिफोन सेवाको गुणस्तर कमजोर भएको विषयमा सेवा प्रदायकलाई यसअघि सचेत गराइएको उल्लेख गर्दै उनले अब कानुनअनुसार कारबाही तथा जरिबाना गरिने बताए।

छलफलमा प्राधिकरणको स्तरीकरण महाशाखाका निर्देशक मिनप्रसाद अर्याल, सेवा गुणस्तर स्तरीकरण शाखाका सहायक निर्देशक सुगन शाक्य, विवेकनाथ महासेठलगायत सहभागी थिए।