‘जनकपुरधाम साहित्य, कला र अन्तरराष्ट्रिय नाट्य महोत्सव’ सुरु, सांस्कृतिक विविधता र एकता को उत्सव

जनकपुरधाम — धनुषा जिल्लाको मैथिली विकास कोषको आयोजनामा चार दिवसीय ‘जनकपुरधाम साहित्य, कला र अन्तरराष्ट्रिय नाट्य महोत्सव’ आजदेखि सुरु भएको छ। रङ्गभूमि मैदानबाट भव्य सांस्कृतिक झाँकीसहित महोत्सवको औपचारिक उद्घाटन सम्पन्न भएको हो। यस कार्यक्रमले सांस्कृतिक समृद्धि र राष्ट्रिय अन्तर्राष्ट्रिय स्तरमा मैथिली भाषाको प्रवद्र्धन गर्ने उद्देश्य राखेको छ।

उद्घाटनका दिन रङ्गभूमि मैदानबाट सुरु भएको शोभायात्रा स्थानीय सडकमार्ग हुँदै नगर परिक्रमा गरियो। यस क्रममा विभिन्न सांस्कृतिक प्रस्तुतिहरू र लोकझाँकीहरूले माहोललाई रंगीन बनाएको थियो। मैथिली वेशभूषामा सजिएका कलाकारहरू, स्थानीय समुदायका प्रतिनिधिहरू, विद्यार्थीहरू र सर्वसाधारणको सहभागिता देखिएको थियो, जसले जनकपुरधामको मुख्य सडक क्षेत्रलाई उत्सवमय बनाएको थियो।

कोषका अध्यक्ष जीवनाथ चौधरीका अनुसार, महोत्सवको मुख्य लक्ष्य जनकपुरधामको बहुआयामिक सांस्कृतिक सम्पदालाई राष्ट्रिय र अन्तर्राष्ट्रिय स्तरमा चिनाउने हो। “विभिन्न जातजाति र समुदायका सांस्कृतिक झल्को प्रस्तुत गरी हाम्रो मौलिक पहिचानलाई सशक्त बनाउने प्रयास गरेका छौँ,” उहाँले भन्नुभयो।

शुक्रबारसम्म सञ्चालन हुने यस महोत्सवअन्तर्गत साहित्यिक गोष्ठी, कवितावाचन, पुस्तक विमोचन, चित्रकला प्रदर्शनी, नाटक मञ्चन र अन्तरक्रिया कार्यक्रमहरू आयोजना गरिने योजना छ। आयोजकका अनुसार, यस कार्यक्रममा स्थानीयदेखि राष्ट्रिय र अन्तर्राष्ट्रिय स्तरका कलाकार, साहित्यकार र रंगकर्मीहरूको सहभागिता रहनेछ।

महोत्सवको पहिलो दिन नै सांस्कृतिक झाँकीमा नेपाली कांग्रेसका नेता विमलेन्द्र निधिको उपस्थिती रहेको थियो। मैथिली वेशभूषामा सजिएर सहभागी भएका उहाँले महोत्सवको सफलताको कामना गर्नुभएको थियो। उहाँले मैथिली भाषा, साहित्य र संस्कृतिको प्रवद्र्धनमा कोषले गरेको भूमिका प्रशंसायोग्य रहेको बताए र यसले सांस्कृतिक एकता र सामाजिक सद्भावलाई सुदृढ गर्ने विश्वास व्यक्त गर्नुभयो।

आयोजक संस्थाले यस वर्ष आफ्नै भवनमा महोत्सव आयोजना गरेको र विगत वर्षहरूको अनुभवलाई समेट्दै यस पटक कार्यक्रमलाई अझ व्यवस्थित, फराकिलो र अन्तर्राष्ट्रिय सहभागितामुखी बनाएको जनाएको छ। जनकपुरधामको सांस्कृतिक धरोहर, धार्मिक महत्व र ऐतिहासिक पृष्ठभूमिलाई साहित्य र नाट्य माध्यमबाट विश्वसामु प्रस्तुत गर्ने उद्देश्यले यो महोत्सव आयोजना गरिएको हो।

सर्वसाधारण, कलाकार र साहित्यप्रेमीहरूलाई यस उत्सवमा सक्रिय सहभागिताका लागि आयोजकले आग्रह गरेको छ। यस सांस्कृतिक उत्सवले आगामी चार दिन सहरलाई साहित्य, कला र रंगमञ्चको मेलमिलापस्थल बनाउन विश्वास व्यक्त गरिएको छ। यस कार्यक्रमले जनकपुरधामको सांस्कृतिक परिदृश्यलाई अन्तर्राष्ट्रिय स्तरमा उचाइ दिन योगदान पुर्‍याउने अपेक्षा गरिएको छ। रासस