पशुपतिनाथ क्षेत्रको महाशिवरात्रिमा थुप्रिएका फोहोरमैला सफाइ अभियान

काठमाडौँ — महाशिवरात्रिको अवसरमा पशुपतिनाथ क्षेत्रलाई सफा, स्वच्छ र पवित्र बनाउन क्रिएसन नेपालले विशेष सफाई अभियान सञ्चालन गरेको छ। यस कार्यक्रमअन्तर्गत करिब पाँच सय स्वच्छताकर्मी र स्वयंसेवकले तीन दिनदेखि निरन्तर रुपमा क्षेत्रको सरसफाइ गरेका हुन्।

क्रिएसन नेपालले ‘सफा गरौं’ अभियानको माध्यमबाट महाशिवरात्रिको पर्वमा भक्तजनहरूको स्वच्छता र संरक्षणलाई लक्षित गरी यस अभियान सञ्चालन गरेको हो। कार्यक्रममा द कोकालाकोला फाउण्डेसनको सहयोग र क्लाइमेट स्मार्ट सिटिज परियोजना अन्तर्गत पशुपति क्षेत्र विकास कोषको सहकार्यमा कार्यान्वयन गरिएको थियो।

हिजो महाशिवरात्रिको दिन विशेष रुपमा फोहोरमैलाको संकलन गरिएको थियो। बिहानदेखि साँझसम्म लगातार गतिविधि सञ्चालन गर्दै सफाइकर्मीहरूले श्रद्धालुहरुको भीडभाडका बीच फोहोर व्यवस्थापन गरेका थिए। यस क्रममा दैनिक रुपमा फोहोर संकलन र सरसफाइका गतिविधिहरु निरन्तर रुपमा चलेका थिए।

क्रिएसन नेपालका कार्यक्रम निर्देशक सुजाता कोइरालाका अनुसार, अभियानको मुख्य उद्देश्य पशुपतिनाथ क्षेत्रलाई दिगो र जिम्मेवार फोहोर व्यवस्थापनको माध्यमबाट संरक्षण गर्नु हो। यसैगरी, महासचिव रोशना सुवेदीले भने, “शिवरात्रि पर्वमा आउने लाखौं भक्तजनहरूको स्वच्छता र स्वाभिमानको रक्षा गर्न यस अभियानले महत्वपूर्ण भूमिका खेलिरहेको छ।”

अभियानको क्रममा कोकाकोला फाउण्डेसनले महाशिवरात्रि अवसरमा आउने भक्तजनहरूलाई निःशुल्क रूपमा १०,००० जिरो सुगर बोतल वितरण समेत गरेको थियो। यसले भक्तजनहरूलाई स्वच्छ र स्वास्थ्यमैत्री पेय पदार्थको उपभोग गर्न प्रोत्साहित गरेको छ।

पशुपतिनाथ क्षेत्र विश्व सम्पदा सूचीमा सूचीकृत भएकोले यसको संरक्षण र व्यवस्थापन अत्यन्तै आवश्यक रहेको छ। क्रिएसन नेपालले यो अभियानको माध्यमबाट जिम्मेवार फोहोर व्यवस्थापन र नागरिक सचेतनामा जोड दिएको छ। यसले दिगो सरसफाइ संस्कृतिको विकास र पर्यावरण संरक्षणमा योगदान पुग्ने विश्वास व्यक्त गरिएको छ।

कुल मिलाएर, महाशिवरात्रिको अवसरमा सञ्चालन गरिएको यस सफाइ अभियानले धार्मिक परम्परा र पर्यावरण संरक्षणको समिश्रणले समर्पित र जिम्मेवार नागरिकता विकासमा टेवा पुर्‍याएको छ।