सिरहामा प्रहरीले ४० ग्राम ब्राउन सुगरसहित एक व्यक्तिलाई पक्राउ

सिरहा । सिरहामा प्रहरीले ब्राउन सुगरसहित एक व्यक्तिलाई पक्राउ गरेको छ। शनिबार दिउँसो करिब सवा १२ बजे नवराजपुर गाउँपालिका वडा नं. ५ झाझपट्टीस्थित सडक खण्डमा गरिएको चेकजाँचका क्रममा २२ वर्षीय श्रवनकुमार कामैत पक्राउ परेका हुन्।

प्रहरीको टोलीले भारतबाट नेपालतर्फ आउँदै गरेको प्र. २–०१–००२ प १६०८ नम्बरको मोटरसाइकललाई शङ्का गरी रोक्दा, उक्त व्यक्तिले ज्याकेटको खल्तीमा लुकाएको लागुऔषध फेला परेको हो।

इलाका प्रहरी कार्यालय महेशपुरपतार र इलाका प्रहरी कार्यालय झाझपट्टीबाट खटिएको संयुक्त प्रहरी टोलीले कामैतको खानतलासी गर्दा, उनको ज्याकेटको खल्तीमा रहेको स्टिलको बट्टामा लुकाएको अवस्थामा ३९.९० ग्राम ब्राउन सुगर फेला परेको जिल्ला प्रहरी कार्यालय सिरहाले जनाएको छ।

पक्राउ परेका श्रवनकुमार कामैत सिरहाकै सखुवानन्कारकट्टी गाउँपालिका वडा नं. २ का बासिन्दा हुन्। जिल्ला प्रहरी कार्यालय सिरहाका सूचना अधिकारी एवं प्रहरी नायव उपरीक्षक रमेशबहादुर पालका अनुसार, कामैतमाथि लागुऔषध मुद्दामा थप अनुसन्धान प्रक्रिया अघि बढाइएको छ।

प्रहरीको यो कारबाहीले जिल्ला भरी लागुऔषधका विरुद्धको अभियानलाई थप गति दिएको छ। प्रहरीले यस प्रकारका अवैध कारोबार रोक्नका लागि निरन्तर निगरानी र चेकजाँच अभियान सञ्चालन गरिरहेको छ।