जनकपुरधाममा ३५० युवायुवतीलाई सीप तालिम, १९६ जनाले पाए रोजगारी

जनकपुरधाम – जानकी महिला जागरण समाज धनुषाले विगत दुई वर्षको अवधिमा जिल्लाका पाँच स्थानीय तहका ३५० युवायुवतीलाई सीपमूलक तालिम प्रदान गरी आत्मनिर्भर बनाएको छ। यसरी तालिम प्राप्त गरेका १९६ जना युवायुवतीले रोजगारीसमेत प्राप्त गरेका छन्।

प्लान इन्टरनेशनल नेपालको साझेदारीमा सवैला, कमला, सहिद, विदेह नगरपालिका र जनकनन्दनी गाउँपालिकाका युवायुवतीलाई लक्षित गरी व्यवसायमूलक तथा दक्षता अभिवृद्धिसम्बन्धी तालिम सञ्चालन गरिएको थियो। यस तालिमले युवायुवतीलाई रोजगारमूलक तथा व्यवसायमुखी बनाउन महत्वपूर्ण भूमिका खेलेको छ।

संस्थाका अध्यक्ष मन्दाकिनी कर्णका अनुसार, १६२ जना युवायुवतीलाई जनही ८३ हजार रुपैयाँ आर्थिक सहयोग प्रदान गरी उनीहरूलाई व्यवसाय सुरु गर्न प्रेरित गरिएको छ। आज जनकपुरधाममा आयोजित ‘दक्ष युवा परियोजना’ जिल्लास्तरीय परियोजना समापन बैठकमा यो जानकारी दिइएको हो।

बैठकमा प्रमुख जिल्ला अधिकारी प्रेमप्रसाद लुइँटेलले सरकारका उद्देश्य र लक्ष्यहरू पूरा गर्न गैरसरकारी संस्थाहरूले निर्वाह गरेको भूमिका अत्यन्त महत्वपूर्ण रहेको बताउनुभयो। उहाँले यस्ता परियोजनाहरूले स्थानीय तहमा रोजगारी सिर्जना र आर्थिक विकासमा टेवा पुर्‍याउने विश्वास व्यक्त गर्नुभयो।

प्लान इन्टरनेशनल नेपालले सन् १९७८ देखि नेपालमा कार्यरत रहँदै आएको छ। हाल यो संस्थाले साझेदार संस्थाहरूको माध्यमबाट मधेस प्रदेशका चार जिल्ला सहित देशभरका १३ जिल्लामा विभिन्न विकासका कार्यक्रमहरू सञ्चालन गरिरहेको छ।