डा. निकोलस भुसालको स्वास्थ्य जटिल: वीर अस्पतालमा भर्ना

काठमाडौं – विभिन्न माग राख्दै ९ दिनदेखि माइतीघर मण्डलामा अनशनरत डा. निकोलस भुसालको स्वास्थ्य अवस्था जटिल भएपछि उपचारका लागि वीर अस्पतालमा भर्ना गरिएको छ। नेपाल चिकित्सक सङ्घको पहलमा डा. भुसाललाई आज बिहान अस्पताल लगिएको हो।

माइतीघरमा अनशन बसिरहेका डा. भुसालको स्वास्थ्यमा समस्या देखिएपछि चिकित्सकको टोलीले स्वास्थ्य जाँच गरेको थियो। जाँचका क्रममा उहाँको स्वास्थ्य अवस्था थप उपचारका लागि अस्पताल लैजानुपर्ने निष्कर्षमा पुगेपछि वीर अस्पतालमा भर्ना गरिएको सङ्घले जनाएको छ।

डा. भुसालले जेन–जी आन्दोलनका क्रममा भएका हत्याका दोषीलाई कारबाही गर्नुपर्ने, आन्दोलनमा पक्राउ परेकालाई रिहा गर्नुपर्ने, भ्रष्टाचारको निष्पक्ष छानबिन गरी दोषीमाथि कारबाही चलाउनुपर्ने र विदेशमा रहेका नेपालीलाई मतदानको अधिकार सुनिश्चित गर्नुपर्ने लगायतका माग राख्दै अनशन सुरु गर्नुभएको थियो।

उहाँको अनशनलाई विभिन्न नागरिक समाजका अगुवा, अधिकारकर्मी र युवा समूहले समर्थन जनाउँदै आएका छन्। डा. भुसालको स्वास्थ्य अवस्था नाजुक बन्दै गएपछि उहाँका समर्थकहरूले सरकारको ध्यानाकर्षण गराउँदै माग पूरा गर्न दबाब बढाएका छन्।