युवालाई लक्षित गर्दै एनसेलको आकर्षक स्टार्टर प्याक ‘युवा सिम’ सार्वजनिक

काठमाडौं – नेपाल टेलिकमको मुख्य प्रतिस्पर्धी एनसेलले युवालाई लक्षित गर्दै नयाँ स्टार्टर प्याक ‘युवा सिम’ सार्वजनिक गरेको छ। यो विशेष प्याकले सन् १९९७ र त्यसपछि जन्मिएका नेपाली नागरिकहरूलाई लक्षित गर्दै डिजिटल जीवनशैलीलाई सहज र सुलभ बनाउने उद्देश्य राखेको छ।

एनसेलका अनुसार, यस ‘युवा सिम’ प्याकको मूल्य करसहित २९९ रुपैयाँ तोकिएको छ। यस प्याकमा अनलिमिटेड एनसेल-टु-एनसेल कल सुविधा, ५ जीबी डेटा, डिजिटल वालेट इसेवा र खल्तीको प्रयोगमा डेटा शुल्क नलाग्ने सुविधा उपलब्ध छन्। यी सेवा २८ दिनसम्म मान्य रहनेछन्। साथै, ग्राहकहरूले अफ–नेट (एनसेलबाट अन्य नेटवर्क) कलमा प्रति मिनेट मात्र १ रुपैयाँको विशेष छुट पाउनेछन्।

यसबाहेक, २८ दिनको अवधिमा यदि ५ जीबी डेटा समाप्त भए पनि ग्राहकहरूले पे–एज–यू–गो डेटा सेवा प्रति एमबी ५० पैसा तिरेर निरन्तर अनलाइन रहने अवसर पाउनेछन्। एनसेलले यस प्याकमार्फत युवाहरूलाई डिजिटल शिक्षा, सामाजिक संजाल र विभिन्न अनलाइन प्लेटफर्महरूमा सजिलै जडित हुने मौका दिदै आएको छ।

एनसेलका चीफ कन्सुमर बिजनेस अफिसर उपाङ्ग दत्तले भने, “युवा सिमलाई सार्वजनिक गर्न पाउँदा हामी अत्यन्तै खुशी छौँ। यसले युवालाई सधैँ कनेक्टेड रहन, विभिन्न अवसरहरूमा सहभागी हुने र डिजिटल भविष्यमा जोडिन मद्दत गर्ने विश्वास लिएका छौँ। यसले उनीहरूको डिजिटल जीवनशैलीलाई सहज बनाउनेछ र शिक्षामा समेत सहयोग पुर्‍याउनेछ।”

यसका अतिरिक्त, एनसेलले २४ घण्टा मान्य १ जीबी डेटाका प्याकहरू पनि उपलब्ध गराएको छ, जसबाट फेसबुक, टिकटक र इन्स्टाग्राम जस्ता सोशल मिडिया प्लेटफर्महरू प्रयोग गर्न सकिन्छ।

‘युवा सिम’ लिन चाहने ग्राहकहरूले आफ्ना नागरिकता, ड्राइभिङ लाइसेन्स वा विद्यार्थी परिचयपत्रको साथ नजिकको एनसेल सेन्टरमा गएर यस सेवा लाभ उठाउन सक्नेछन्। यदि नागरिकता वा ड्राइभिङ लाइसेन्स नभए, भने अभिभावकको परिचयपत्र र विद्यार्थी परिचयपत्र प्रस्तुत गरेपछि पनि यो सिम प्राप्त गर्न सकिन्छ।

एनसेलले यस योजनाबाट युवाहरुलाई डिजिटल यात्रा सुरु गर्न थप प्रोत्साहन दिने विश्वास व्यक्त गरेको छ।