बालेन शाहको नयाँ पार्टी ‘देश विकास पार्टी’ दर्ता गर्न तयारी तीव्र, ज्वागलमा पार्टी कार्यालय

ललितपुर – काठमाडौं महानगरपालिकाका मेयर बालेन शाहले आफ्नो नयाँ राजनीतिक दल ‘देश विकास पार्टी’ दर्ता गर्न तयारी तीव्र बनाएका छन्। यदि राष्ट्रिय स्वतन्त्र पार्टी (रास्वपा) सँगको छलफल सकारात्मक निष्कर्षमा पुगेन भने, ज्वागलमा रहेको निर्माणाधीन घरलाई नै पार्टी कार्यालयको रुपमा प्रयोग गरिने तयारी भइरहेको स्रोतले जनाएको छ।

ज्वागलमा रहेको उक्त घरको बाहिरी संरचना निर्माणको काम अन्तिम चरणमा पुगेको छ भने भित्री कोठाहरूमा अफिस सेटअपको काम पनि सुरु भइसकेको छ। कार्यालयको आवश्यक व्यवस्थापन, फर्निचर र अन्य संरचनाका कामहरू तीव्र गतिले भइरहेको स्रोतले बताएको छ।

केही दिनयता बालेन शाह ज्वागलमै रहेका आफ्ना सहयोगी कुमार बेनको घरमा बसेर विभिन्न राजनीतिक भेटघाट र छलफलमा सक्रिय छन्। रास्वपा सँग सहकार्यको सम्भावनाबारे निरन्तर संवाद भइरहेका भए पनि अन्तिम सहमति भने नभएको स्रोतको भनाइ छ।

स्रोतका अनुसार यदि सहमति हुन्छ भने बालेन रास्वपासँगै अघि बढ्नेछन्। तर, यदि सहमति नभए, भने ‘देश विकास पार्टी’लाई औपचारिक रूपमा अघि बढाउँदै ज्वागलस्थित उक्त घरबाट पार्टी गतिविधिहरू सञ्चालन गरिने तयारी छ। बालेनको नयाँ राजनीतिक कदमलाई लिएर राजनीतिक वृत्तमा चासो र उत्सुकता बढ्दो छ। यसले आगामी निर्वाचन र स्थानीय राजनीतिमा ठूलो प्रभाव पार्ने अपेक्षा गरिएको छ।