रुकुमपूर्वमा भारी वर्षाका कारण मध्यपहाडी लोकमार्ग अवरुद्ध, यात्रुहरू अलपत्र

रुकुमपूर्व । रुकुमपूर्वमा बुधबार साँझ परेको भारी वर्षाका कारण मध्यपहाडी लोकमार्ग अवरुद्ध भएको छ। भूमे गाउँपालिका-४ स्थित काडाबगर र धौलापहिरोमा लेदोसहितको भल र पहिरो खस्दा सडक पूर्ण रूपमा बन्द भएको हो।

सडक अवरुद्ध भएपछि काठमाडौं हुँदै रुकुमपूर्व, रुकुमपश्चिम र डोल्पातर्फ जाने यात्रुवाहक बस तथा अन्य सवारीसाधन बाटोमै रोकिएका छन्। पहिरोका कारण दर्जनौं यात्रुहरू अलपत्र परेका छन्।

प्रशासनले अवरुद्ध सडक खुलाउन डोजर लगायतका उपकरण परिचालन गरेको भए पनि लगातार वर्षा भइरहेकाले पहिरो पन्छाउन र सडक पुनः सञ्चालनमा ल्याउन समस्या भइरहेको प्रमुख जिल्ला अधिकारी कोपिला राईले जानकारी दिइन्।

उनीका अनुसार, सिस्ने र भूमे गाउँपालिकाका जेसीबीसमेत परिचालन गरिएको छ। तर, पहिरो ठूलो र सडक क्षतिग्रस्त भएकाले पूर्ण रूपमा सडक सञ्चालनमा आउन अझै केही समय लाग्ने उनले बताए।

वर्षा नरोकिएसम्म थप पहिरो खस्ने जोखिम रहेकाले यात्रुहरूलाई सावधानी अपनाउन र आवश्यक छ भने यात्रा नगर्न प्रशासनले आग्रह गरेको छ। स्थानीय प्रशासन र उद्धार टोलीले स्थिति नियन्त्रणमा ल्याउन निरन्तर प्रयास गरिरहेका छन्।