प्रधानमन्त्री सुशीला कार्कीविरुद्ध अवहेलना मामिलामा सर्वोच्चबाट लिखित जवाफ माग

काठमाडौँ । सर्वोच्च अदालतले प्रधानमन्त्री सुशीला कार्कीविरुद्ध दायर गरिएको अदालत अवहेलना मुद्दामा लिखित जवाफ माग्ने आदेश जारी गरेको छ।

राजदूत फिर्ता बोलाउने निर्णयविरुद्ध सर्वोच्चले दिएको अन्तरिम आदेश पालना नभएको आरोपमा अधिवक्ता प्रतिभा उप्रेती र प्रेम सिलवालले दायर गरेको निवेदनमाथि न्यायाधीश हरिप्रसाद फुयाँल र न्यायाधीश अब्दुल अजिज मुसलमानको संयुक्त इजलासले आइतबार प्रधानमन्त्री कार्कीसमक्ष लिखित जवाफ पेश गर्न आदेश दिएको हो।

वर्तमान सरकारले गत असोज ३० गते अघिल्लो सरकारले नियुक्त गरेका ११ देशका राजदूतलाई फिर्ता बोलाउने निर्णय गरेका थिए।

यसअघि, सर्वोच्चका न्यायाधीशद्वय सारंगा सुवेदी र श्रीकान्त पौडेलको संयुक्त इजलासले राजदूत फिर्ता बोलाउने निर्णय तत्काल कार्यान्वयन नगरी यथास्थितिमा राख्न गत १६ कात्तिकमा अन्तरिम आदेश जारी गरेको थियो।

सर्वोच्च अदालतको अन्तरिम आदेशपछि सरकारले परराष्ट्र मन्त्रालयमा हाजिर हुन राजदूतहरूलाई निर्देशन दिएको थियो। हाल राजदूतहरू परराष्ट्र मन्त्रालयमै उपस्थित भएर कार्यरत रहेको मन्त्रालयले जनाएको छ।