हेटौँडामा सडक विस्तार: उद्योग वाणिज्य संघको कार्यालयमा पनि चलाइयो डोजर

मकवानपुर – हेटौँडा बजार क्षेत्रमा भइरहेको सडक विस्तार परियोजनाअन्तर्गत मकवानपुर उद्योग वाणिज्य संघको कार्यालय समेत भत्काइएको छ। त्रिभुवन राजपथको सडक सीमा भित्र निर्माण भएको उक्त संरचना सडक डिभिजन कार्यालय हेटौँडाले आज बिहान डोजर प्रयोग गरेर हटाएको हो।

सडक विस्तार अभियान अन्तर्गत हेटौँडा बजार क्षेत्रका २५ मिटर सडक क्षेत्रभित्र पर्ने संरचना हटाउने काम आजदेखि सुरु गरिएको हो। हेटौँडा–१० स्थित राप्ती रोड क्षेत्रमा २५–२५ गज सडक सीमा खाली गराउन जेसीबीसहितका मेसिन परिचालन गरिएको बताइएको छ।

सडक विस्तारका क्रममा सुरक्षा निकायको बाक्लो उपस्थिति बीच सार्वजनिक तथा निजी दुवै संरचना क्रमशः हटाइँदै छन्। महेन्द्र राजमार्गदेखि त्रिभुवन राजपथसम्मको ९.५ किलोमिटर सडक खण्डमा पर्ने अवैध तथा सीमा अतिक्रमण गरी बनेका संरचना हटाउने कार्य तीव्र गतिमा अघि बढाइएको सडक डिभिजन कार्यालयले जानकारी दिएको छ।

स्थानीयहरूका अनुसार सडक विस्तारले दीर्घकालीन रूपमा यातायात सहज बनाउने अपेक्षा गरिएको छ। तर केही व्यापारी तथा सर्वसाधारणले पर्याप्त जानकारी नदिई संरचना भत्काइएको भन्दै असन्तुष्टि पनि जनाएका छन्।