धनुषामा सशस्त्र प्रहरीले १३ सय ७० किलो अवैध काजु बरामद

जनकपुरधाम । सशस्त्र प्रहरीले धनुषामा ठूलो परिमाणमा अवैध काजु बरामद गरेको छ। भारतबाट भन्सार छली चोरी–पैठारी गरी ल्याइएको काजु सम्बन्धी गोप्य सूचनाका आधारमा सशस्त्र प्रहरीको ८ नम्बर गण, धनुषाले उक्त सामग्री नियन्त्रणमा लिएको हो।

नगराईन नगरपालिका–२, जटहीस्थित खेतबारीमा लुकाएर राखिएको अवस्थामा १,३७० किलो काजु फेला परेको सशस्त्र प्रहरीले जनाएको छ। बरामद काजुको बजार मूल्य करिब १३ लाख ७० हजार रुपैयाँ रहेको प्रहरीको अनुमान छ।

अवैध रुपमा सीमा नाकाबाट नेपाल भित्र्याइएका कारण उक्त काजु आवश्यक प्रक्रिया अनुसार जनकपुर भन्सार कार्यालयमा बुझाइएको सशस्त्र प्रहरीले जानकारी दिएको छ।

सशस्त्र प्रहरीले सीमाक्षेत्रमा अवैध गतिविधि नियन्त्रण गर्न निगरानी थप कडा गरिएको पनि जनाएको छ।