वीरगन्जमा कर्फ्यु थप, संवेदनशील क्षेत्रहरूमा सुरक्षा कडाइ, सार्वजनिक गतिविधि प्रतिबन्ध

वीरगन्ज । वीरगन्ज महानगरपालिका क्षेत्रमा सुरक्षा अवस्था थप गम्भीर बन्दै गएपछि संवेदनशील क्षेत्रहरूमा लागू कर्फ्यु आदेश पुनः थपिएको छ। जिल्ला प्रशासन कार्यालय पर्साले शान्ति र सुरक्षा कायम राख्नका लागि कर्फ्यु अवधि अझै बढाएको जानकारी दिएको छ।

मंगलबार दिउँसो जारी विज्ञप्तिमा प्रशासनले आज साँझ ६ बजेसम्म कर्फ्यु जारी रहने जनाएको छ। यसअघि सोमबार साँझदेखि लागु गरिएको कर्फ्युको अवधि मंगलबार बिहान ८ बजेसम्म थियो, जुन अब बेलुका ६ बजेसम्म निरन्तरता दिइएको हो।

प्रशासनका अनुसार, अवाञ्छित गतिविधि तथा असमाजिक तत्वहरूको गतिविधि रोक्न र सर्वसाधारणको सुरक्षा सुनिश्चित गर्न कर्फ्यु थपिएको हो। यस क्रममा यातायात, भेला, जुलुस, प्रदर्शन, सभा र बैठक जस्ता सबै सार्वजनिक गतिविधि पूर्ण रूपमा निषेधित गरिएको छ।

अत्यावश्यक सेवाबाहेक सर्वसाधारणलाई घर बाहिर निस्कन जिल्ला प्रशासनले कडाइका साथ आग्रह गरेको छ। कर्फ्यु उल्लंघन गर्नेहरूविरुद्ध कडा कदम चालिने र आवश्यक परे सुरक्षाकर्मीलाई गोली चलाउनसमेत अधिकार दिइएको स्पष्ट गरेको छ।

वीरगन्ज महानगरको पूर्वमा बसपार्क, नगवा, इनर्वा, पश्चिममा सिर्सिया पुल, दक्षिणमा शंकराचार्य गेट र उत्तरमा गण्डक चोकसम्म कर्फ्यु लागू गरिएको छ। प्रशासनको यस कदमले शान्ति र सुरक्षा कायम राख्ने उद्देश्य राखिएको छ भने सर्वसाधारणलाई संयमित रहन र आदेशको पूर्ण पालना गर्न अनुरोध गरिएको छ।