एनपीएलमा सट्टेबाजी: ९ भारतीय र १ नेपालीसहित १० जना पक्राउ, २ करोड ५ लाखको कारोबार

काठमाडौँ । त्रिवि क्रिकेट मैदानमा जारी नेपाल प्रिमियर लिग (एनपीएल) दौरान सट्टेबाजी गराएको र म्याच फिक्सिङ गर्न खोजेको आरोपमा प्रहरीले १० जनालाई पक्राउ गरेको छ। पक्राउ पर्नेहरूमा ९ जना भारतीय नागरिक र १ जना नेपाली रहेका छन्। उनीहरूलाई काठमाडौँका विभिन्न स्थानबाट नियन्त्रणमा लिइएको हो।

जिल्ला प्रहरी परिसर काठमाडौँका एसएसपी रमेश थापाका अनुसार पक्राउ परेका समूहले २ करोड ५ लाख रुपैयाँ बराबरको अवैध सट्टेबाजी कारोबार गरेको प्रारम्भिक अनुसन्धानबाट खुलेको छ। सोमबार आयोजित पत्रकार सम्मेलनमा एसएसपी थापाले भने,
“हामीले पत्ता लगाएको कारोबार अहिले २ करोड ५ लाख पुगेको छ। थप अनुसन्धान भइरहेको छ।”

बल्खुबाट ८ जना एकै ठाउँबाट पक्राउ

सट्टेबाजीमा संलग्न रहेको आरोपमा प्रहरीले काठमाडौँ महानगरपालिका–१४, बल्खु क्षेत्रबाट ८ जनालाई पक्राउ गरेको थियो। पक्राउ पर्नेहरूमा भारतका–

• राजा यदुला

• महेश बाबु

• पण्डित श्रीनिवासुलु

• सेख सोयब

• नभिन मड्डेला

• महमद रफी सेख

• साई कुमार तम्मिसेट्टी

• सेख चन्द बसल

समेत रहेका छन्।

प्रहरीले उनीहरूको साथबाट सट्टेबाजीमा प्रयोग भएका १५ थान मोबाइल फोन बरामद गरेको जनाएको छ।

विदेशी बेटिङ वेबसाइटमार्फत अवैध कारोबार

प्रहरीको प्रारम्भिक अनुसन्धानका अनुसार पक्राउ परेका व्यक्तिहरूले–

• stake.com

• betbook.com

• betacular live

जस्ता अनलाइन बेटिङ साइटमार्फत रकम हारजित हुनेगरी सट्टेबाजी सञ्चालन गरेका थिए।

ती वेबसाइटमार्फत खेलाडीहरूको प्रदर्शन, रन, विकेट, क्याच, टस लगायतका विषयमा तत्कालै दाउ लगाउने प्रणालीमार्फत ठूलो परिमाणमा कारोबार भएको देखिएको प्रहरीले जनाएको छ।

म्याच फिक्सिङको प्रस्ताव : एक रन आउटका लागि १ करोडसम्म

एनपीएलमा चलिरहेको सट्टेबाजी प्रकरणसँगै म्याच फिक्सिङको प्रस्ताव राख्ने दुई जना व्यक्तिलाई प्रहरी प्रशासनले यसअघि नै मंसिर २ गते पक्राउ गरिसकेको छ।

पक्राउ पर्नेमा–

• भारत हरियाणा घर भएका २८ वर्षीय दिलप्रित सिंह

• बर्दियाको बारबर्दिया–८ घर भई भारतमा बस्दै आएका रेविका सिंह ठकुरी

रहेका छन्।

यी दुवैले विभिन्न खेलाडीहरूलाई रन आउट गरिदिएबापत १ करोड रुपैयाँसम्म दिन सकिने प्रस्ताव राखेको अनुसन्धानबाट खुलेको छ। उनीहरूले खेलको विशेष क्षणमा ‘स्पट फिक्सिङ’ गराउन प्रयास गरेको प्रहरीको दाबी छ।

एनपीएलमा अवैध गतिविधि बढेपछि निगरानी कडा

एनपीएल जस्तो ठूला घरेलु क्रिकेट लिगमा सट्टेबाजी र फिक्सिङ प्रयास फेला परेपछि प्रहरी प्रशासनले मैदान वरपर तथा खेलसँग जोडिएका गतिविधिमा निगरानी कडा पारेको छ।
यस घटनाले नेपाली क्रिकेटको मर्यादामाथि प्रश्न उठाएको भन्दै क्रिकेट क्षेत्रका विज्ञहरूले चिन्ता व्यक्त गरेका छन्।