विवाह पञ्चमीको अवसरमा मलंगवामा मदिरा तथा माछामासु बिक्री पूर्ण रूपमा प्रतिबन्ध

सर्लाही । सर्लाही सदरमुकाम मलंगवामा आज विवाह पञ्चमी पर्वको अवसरमा मदिरा तथा माछामासु बिक्री–वितरणमा पूर्ण प्रतिबन्ध लागू गरिएको छ। नगर क्षेत्रमा धार्मिक शान्ति, पवित्रता र सामाजिक सद्भाव कायम राख्ने उद्देश्यले मलंगवा नगरपालिकाले एकदिने विशेष प्रतिबन्धात्मक व्यवस्था गरेको हो।

नगरपालिकाको प्रशासन शाखाका प्रमुख रामपुकार यादवद्वारा जारी सूचनामा आजको दिन नगर क्षेत्रभित्र कुनै पनि प्रकारका माछामासु तथा मदिरा बिक्री–वितरण नगर्न आग्रह गरिएको उल्लेख छ। साथै नगरभित्र पशुपन्छी तथा जीवजन्तुको वध कार्य पनि निषेधित गरिएको सूचनामा प्रष्ट पारिएको छ।

विवाह पञ्चमीलाई धार्मिक पवित्र पर्वका रूपमा मनाइने भएकाले नगरपालिकाले स्थानीयवासी, व्यापारी र व्यवसायीलाई पूर्ण सहयोग गर्न अनुरोध गरेको छ। यसैबीच, मलंगवाका स्थानीयले जनकपुरधाममा झैँ नगर परिक्रमा गराउँदै राम–सीताको प्रतीकात्मक विवाह गर्ने तयारी पूरा गरेका छन्। नगरभरि यस अवसरमा धार्मिक वातावरण, भजन–कीर्तन तथा सांस्कृतिक कार्यक्रमहरूको तयारी तीव्र बनेको छ।

नगरपालिकाले स्थानीय सुरक्षाकर्मी र अनुगमन टोलीलाई आवश्यक निगरानी र कार्यान्वयनमा खटाएकोछ। उल्लंघन गर्नेहरूमाथि आवश्यक कारबाही गरिने चेतावनीसमेत दिइएको छ।

विवाह पञ्चमीका कारण मलंगवामा धार्मिक आस्था, सांस्कृतिक मूल्यमान्यता र अनुशासन कायम गर्दै आजको दिन भव्य रूपमा पर्व मनाइने जनाइएको छ।