विश्वासको मत नपुग्ने निश्चित भएपछि मधेस प्रदेशका मुख्यमन्त्री यादव आजै राजीनामा दिने तयारी

काठमाडौँ । मधेस प्रदेशका मुख्यमन्त्री सरोजकुमार यादवले आजै पदबाट राजीनामा दिने तयारी गरेका छन्। बुधबार दिउँसो २ बजे बस्ने प्रदेशसभा बैठकमा उनले आफ्नो पद त्याग गर्ने सम्भावना एमाले स्रोतहरूले पुष्टि गरेका छन्। सर्वोच्च अदालतले २४ घण्टाभित्र विश्वासको मत लिन आदेश दिएपछि बोलाइएको आज बिहानको बैठकमा नै सत्तापक्षकै सांसदहरू अनुपस्थित हुने सूचना आएपछि मुख्यमन्त्रीले भरोसा जुटाउन नसक्ने निष्कर्ष निकालेका हुन्।

सर्वोच्चको आदेशपछि बदलियो सत्ता समीकरण

सोमबार साँझ सर्वोच्च अदालतले मुख्यमन्त्री यादवलाई २४ घण्टाभित्र विश्वासको मत लिन परमादेश जारी गरेको थियो। त्यसअनुसार बुधबार बिहान नै प्रदेशसभा बैठक बोलाइए पनि सत्तापक्षकै सांसद अनुपस्थित रहने भएपछि बैठक २ बजेसम्म सारिएको छ।

नेकपा एमाले मधेस प्रदेशसभाका प्रमुख सचेतक हरिनारायण महतोले आफूहरूले मुख्यमन्त्रीलाई राजीनामा दिने सुझाव दिएको बताए। उनका अनुसार, “अहिलेको अवस्थामाअनुसार विश्वासको मत लिँदा पनि बहुमत पुग्ने सम्भावना छैन, त्यसैले राजीनामा नै उपयुक्त हुनेछ,” भन्ने सुझाव आफूले दिएको बताए।

मुख्यमन्त्री पक्ष पनि राजीनामाप्रति सकारात्मक

मुख्यमन्त्री यादव निकट एक सांसदका अनुसार, यादवले आफ्नो भाषण तथा राजीनामा पत्रको प्रारूपबारे छलफल गरिरहेका छन्। उनले भने, “मुख्यमन्त्रीजीले २ बजे बस्ने प्रदेशसभा बैठकमा आफ्नो धारणा राखेर राजीनामा दिने मनस्थिति बनाइसक्नुभएको छ।”

पृष्ठभूमि: विवादास्पद नियुक्ति र राजनीतिक संकट

सरोजकुमार यादव गत कात्तिक २३ गते तत्कालीन प्रदेश प्रमुख सुमित्रा सुवेदी भण्डारीले संविधानको धारा १६८(३) बमोजिम एमाले संसदीय दलका नेता भएको नाताले मुख्यमन्त्री नियुक्त गरेकी थिइन्। यो नियुक्ति स्वयं विवादमा परेपछि सर्वोच्च अदालतमा मुद्दा दायर भएको थियो।

यसअघि मुख्यमन्त्री जितेन्द्र सोनलले विश्वासको मत पाउने अवस्था नदेखिएपछि राजीनामा दिएपछि यादव नियुक्त भएका थिए। तर नयाँ सरकारले स्थिरता पाउन नसक्दा मधेस प्रदेशमा निरन्तर राजनीतिक अस्थिरता देखिएको छ।

मुख्यमन्त्रीको विवाद पछि प्रदेश प्रमुख भण्डारीलाई सरकारले फिर्ता गरिसकेको छ भने प्रदेशसभा सभामुख रामचन्द्र मण्डल पनि पदच्युत भइसकेका छन्।