नेपालमा दीर्घकालीन पूर्वाधार विकासका लागि १५ वर्षे मास्टर प्लान आवश्यक – वीरेन्द्रराज पाण्डे

काठमाडौँ । नेपाल उद्योग परिसंघका अध्यक्ष वीरेन्द्रराज पाण्डेले देशको दीर्घकालीन पूर्वाधार विकासका लागि कम्तीमा १५ वर्षको मास्टर प्लान आवश्यक रहेको बताएका छन्। उनले सडक सञ्जाल, प्रसारण लाइन, रेलमार्ग, विमानस्थल र अन्य कनेक्टिभिटी पूर्वाधारलाई समेट्ने दीर्घकालीन योजनाको महत्व औंल्याएका छन्।

बैठकमा बोलेका अध्यक्ष पाण्डेले पूर्वाधार विकासलाई केवल सडक निर्माणसँग सीमित नगरी ऊर्जा, यातायात, लजिस्टिक्स, सहरी विकास, खानेपानी, सरसफाइ र डिजिटल पूर्वाधारलाई एउटै प्रणालीका रूपमा विकास गर्न आवश्यक रहेको बताए। उनले भने, “पूर्वाधार क्षेत्रलाई ग्रोथ इन्जिन बनाउनका लागि सम्पूर्ण इकोसिस्टममा काम गर्नुपर्छ। कम्तीमा १०-१५ वर्षभित्र हाम्रो रोड नेटवर्क, ट्रान्समिसन लाइन, रेलवे र एयरपोर्टको भविष्यतर्फको योजना सबैले बुझ्नुपर्छ।”

अध्यक्ष पाण्डेले सार्वजनिक खरिदसम्बन्धी कानुनमा भएका सुधारहरू सकारात्मक भए पनि ठूला आयोजनाका लागि छुट्टै कानुनी व्यवस्था आवश्यक रहेको स्पष्ट पारे। भूमि प्राप्ति, क्लियरेन्स र वनसम्बन्धी प्रक्रियालाई सहज बनाउनु भनेको पूर्वाधार योजनाहरूको सफलताका लागि अनिवार्य हो भन्ने उनको धारणा छ।

ऊर्जा क्षेत्रको विकासबारे बोल्दै पाण्डेले केवल उत्पादनमा मात्रै होइन, ऊर्जा सुरक्षा र बजार विस्तारलाई पनि प्राथमिकता दिनुपर्ने बताए। नेपाललाई हालको करिब ४४ अर्ब अमेरिकी डलरको अर्थतन्त्रबाट सन् २०३९ सम्ममा १०० अर्ब डलर पुर्याउन वार्षिक ६ प्रतिशतको वास्तविक आर्थिक वृद्धिको आवश्यक रहेको उनले बताए। साथै, उपभोगमा आधारित अर्थतन्त्रबाट लगानी, उत्पादन र निर्यातमुखी अर्थतन्त्रतर्फ जाने आवश्यक रहेको उनको जोड थियो।

यसले नेपालले दीर्घकालीन र समग्र पूर्वाधार विकासको माध्यमबाट आर्थिक समृद्धि हासिल गर्न सक्ने निश्चितता व्यक्त गरिएको छ।